प्रधानमन्त्री केपी शर्मा ओलीले कसुरको अनुसन्धान गर्दा पद र अनुहार नहेरी निष्पक्ष छानबिन गर्न नेपाल प्रहरीलाई निर्देशन दिएका छन्।
६४ औं प्रहरी दिवसको अवसरमा शुक्रबार प्रहरी प्रधान कार्यालय काठमाडौंमा आयोजित कार्यक्रममा बोल्दै प्रधानमन्त्री ओलीले कुनै पनि किसिमको दवाबमा नपरी निष्पक्ष अनुसन्धान गर्न प्रहरी संगठनलाई निर्देशन दिएका हुन्।
प्रधानमन्त्री ओलीले अपराध अनुसन्धानको सवालमा प्रहरीले सरकारमा सहभागी सत्तापक्ष, राजनीतिक दल, ओहोदा, पद वा सम्पत्ति लगायतका विषय हेर्न नहुने बताए।
'कुन पार्टी सरकारमा छ। यो प्रहरीले वास्ता गर्नुपर्ने विषय होइन। कसले अपराध गर्यो? को पक्षमा छ? को विपक्षमा छ? कुन पदमा छ? कुन ओहोदामा छ? के हैसियतको मान्छे हो? कति सम्पत्तिवान मान्छे हो? यस्ता कुराहरु प्रहरीलाई मतलब हुनुहुँदैन,' उनले भने, 'कानुन पालना, कार्यान्वयन र अनुहार नहेरिकन निष्पक्ष छानबिन गर्नुपर्छ। कसैको दवाब मान्न हुँदैन।'
प्रधानमन्त्री ओलीले राजनीतिक दवाबको वास्ता नगरेपछि दवाब दिनेले पनि दवाब दिन छाड्ने र निष्पक्ष न्याय निरुपणबाट समाजमा सत्य स्थापित हुने बताए। अपराधको राजनीतिकरण गर्ने अनि राजनीतिलाई अपराधिकरण गरी निष्पक्ष अनुसन्धान गर्न व्यवधान सिर्जना गरी प्रहरीलाई नै आरोप लगाउने प्रवृत्ति समाजमा देखिने गरेको उल्लेख गर्दै उनले त्यस्ता गतिविधिबाट प्रहरी सधैं सजग हुनुपर्नेमा जोड दिए।
