प्रमुख प्रतिपक्ष दल नेपाली कांग्रेसका सभापति एंव पूर्वप्रधानमन्त्री शेरबहादुर देउवाले आफू छिट्टै चीन भ्रमणमा जाने बताएका छन्।
दसैं, तिहार र छठका अवसरमा कांग्रेसले आइतबार आयोजना गरेको चियापान कार्यक्रममा बोल्दै देउवाले आफूलाई चिनियाँ राष्ट्रपति सी चिनफिङले भ्रमणको निम्तो दिएको बताए।
‘उहाँले निम्तो दिनु भएको छ। म छिट्टै चीन जान्छु,’ उनले भने।
सभापति देउवा र राष्ट्रपति सीबीच शनिबार साँझ एक्लाएक्लै भेटवार्ता भएको थियो।
भेटका क्रममा सीले नेपालमा कुन पार्टी शक्तिमा छ भन्ने कुराले दुई देशबीचको सम्बन्धमा खासै अर्थ नराख्ने बताएका थिए।
सीले नेपाल र चीन धेरै पहिलादेखि नै मैत्रीपूर्ण छिमेकी, असल दाजुभाइ र साथी भएको र भविष्यमा स्थायी र मैत्रीपूर्ण सम्बन्ध कायम राख्ने र त्यस्तो सम्बन्धका लागि नेपालमा कुन पार्टी सत्तामा छ भन्ने कुराले खासै अर्थ नराख्ने बताएका थिए।
सीले नेपाली कांग्रेस पार्टी र चीनबीच ऐतिहासिक सम्बन्ध रहेको उल्लेख गर्दै नेपाल-चीन सम्बन्धमा नेपाली कांग्रेसले सरकार चलाउँदा पुर्याएको योगदानलाई चिनियाँ जनताले कहिल्यै नबिर्सने पनि बताएका थिए।
उनले नेपाली कांग्रेससँगको थप सम्बन्ध र सहकार्यका लागि चिनियाँ कम्युनिष्ट पार्टी इच्छुक रहेको पनि देउवासँगको भेटका क्रममा उल्लेख गरेका थिए।
भेटका क्रममा सभापति देउवाले आफू पहिलो पटक प्रधानमन्त्री हुँदा सन् १९९६ मा राष्ट्रपति जियाङ जमिनको नेपाल भ्रमण भएको सम्झना गरेका थिए।
देउवाले नेपालको सार्वभौमसत्ताको रक्षा र विकासका लागि चीनले गरेको दीर्घकालीन सहयोगका लागि धन्यवाद व्यक्त गरेका थिए।
उनले नेपाल एक चीन नीतिप्रतिको सधैँ प्रतिवद्ध रहेको उल्लेख गर्दै नेपाली भूमिमा कहिल्यै पनि चीन विरोधी गतिविधि गर्न नदिने बताएका थिए।
चियापान समारोहमा बोल्दै देउवाले चीनले केरूङ-काठमाडौं जोड्न दुई सुरूङ बनाउने कुरा सकारात्मक भएको र कांग्रेसले त्यसको स्वागत गर्ने बताए।