सत्तारुढ नेपाल कम्युनिष्ट पार्टीले चिनियाँ राष्ट्रपति सी चिनफिङको नेपाल भ्रमणको समीक्षा गर्ने भएको छ।
नेकपाले सी भ्रमणबारे समीक्षा गर्न मंगलबारका लागि सचिवालय बैठक डाकेको हो।
‘मंगलबार समीक्षा बैठक बस्दै छ’ एक सचिवालय सदस्यले भने, ‘दुई अध्यक्षले आजै बैठकको अजेण्डा तय गरिसक्नु भएको छ।’
त्यस्तै नेकपा सचिवालय बैठकले पार्टी एकताको बाँकी काम टुङ्ग्याउने विषयमा समेत छलफल गर्नेछ। नेकपामा केही आयोगको नेतृत्व टुङ्गो लाग्न बाँकी छ। केन्द्रीय अनुशासन आयोग, लेखा परिक्षण आयोग, निर्वाचन आयोग लगायतलाई पूर्णता दिन बाँकी छ। मुख्यतः नेकपाअनुशासन आयोगमा पूर्व एमाले तर्फबाट अमृत बोहोरा र पूर्व माओवादी तर्फबाट अमिक शेरचनको दाबेदारी छ।
ती सचिवालय सदस्यका अनुसार पार्टी एकताको बाँकी काम सक्ने र द्वन्द्वकालीन मुद्दा टुङ्गो लगाउन आवश्यक सत्य निरुपण तथा मेलमिलाप आयोग सम्बन्धी विधेयकको तयारीबारे बैठकमा छलफल हुनेछ।
