अमेरिकी राष्ट्रपति डोनाल्ड ट्रम्पले ‘मूर्ख नबन्नू’ भन्दै पठाएको चिठी टर्कीका राष्ट्रपति रेजेप ताइयिप एर्दोआनले डस्टबिनमा फ्याँकिदिएका छन्।
सिरियाबाट अमेरिकी सेनालाई फिर्ता बोलाएपछि अक्टुबर ९ मा ट्रम्पले एर्दोआनलाई चिठी पठाएका थिए।
'कडा मान्छे नहुनुहोस्, मूर्ख नबन्नुस्,' ट्रम्पले उक्त चिठीमा लेखेका थिए।
पत्र पाएको दिन टर्कीले कुर्द नेतृत्व सेनाको विरूद्ध सीमापार आक्रमण गरेको थियो।
'हामीसँगै काम गर्नु नै राम्रो सम्झौता हुन्छ, तपाईं हजारौं मान्छे मार्नको लागि जिम्मेवार हुन चाहनुहुन्न, र म टर्कीको अर्थतन्त्रको विनाशको कारण बन्न चाहन्नँ' ट्रम्पले उक्त चिठीमा उल्लेख गरेका छन्।
त्यसको जवाफमा एर्दोआनले उक्त प्रस्तावलाई अस्वीकार गर्दै डस्टबिनमा फ्याँकेको बिबिसीले जनाएको छ। त्यसपत्रको अन्त्यमा ट्रम्पले एर्दोआनलाई फोन समेत गर्ने उल्लेख गरेका थिए।
ट्रम्पले सिरियाबाट आफ्नो सेना फिर्ता बोलाएपछि उनी विवादमा तानिएका हुन्।
यस कामबाट ट्रम्पको आफ्नै पार्टीका नेताहरू असन्तुष्ट देखिन्छन्।
सेना फिर्ता बोलाएसँगै टर्कीले सिरियामा आक्रमण गर्न राम्रो मौका हात पारेको हो।