स्वास्थ्य तथा जनसंख्या मन्त्रालयले कर्मचारी समायोजनको गुनासो निवेदन दर्ता नगर्ने भएको छ।
आइतबारदेखि कर्मचारी समायोजनका गुनासो मन्त्रालयमा दर्ता नहुने प्रमुख जनस्वास्थ्य प्रशासक महेन्द्रप्रसाद श्रेष्ठले जानकारी दिए।
‘कात्तिक १ गतेदेखि मन्त्रालयमा गुनासो दर्ता गरिँदैन,’ श्रेष्ठले भने, ‘अहिलेसम्म पनि समायोजनका लागि निरन्तर गुनासो दर्ता भइराखेका छन्।’
गत चैतमै निजामती सेवाका प्रशासन लगायतका कर्मचारी समायोजन भए पनि स्वास्थ्यतर्फको समायोजन सकिएको थिएन।
मन्त्रालयले बिहीबार निकालेको सूचनामा अबदेखि वैद्य र ल्याब असिष्टेण्ट पद बाहेकका गुनासो दर्ता नहुने जानकारी दिएको छ।
मन्त्रालयले असोज ९ गते सूचना निकालेर असोज १७ गतेसम्म गुनासो दर्ता गरिसक्न आग्रह गरेको थियो।