राष्ट्रिय जनता पार्टी अध्यक्ष मण्डलका सदस्य राजेन्द्र महतोले संघीय समाजवादी र राजपाबीचको एकता सहमति नजिक पुगेको दाबी गरेका छन्।
दुवै पार्टीको नेतृत्व पार्टी एकता गर्नुपर्छ भन्नेमा सकारात्मक रहेकाले पार्टी एकता हुनेमा आफू विश्वस्त रहेको उनले बताए ।
'केही कुरा मिल्न बाँकी छन्। ती कुरा मिलेपछि हामी औपचारिक बैठक बसेर त्यसलाई औपचारिकता दिन्छौं,’ महतोले सेतोपाटीसँग भने,'संगठनको समायोजन र नेतृत्वको व्यवस्थापनमा कसरी अघि बढ्ने भन्नेमा छलफल भएको छैन।'
एकतापछि बन्ने पार्टीको नाममा दुवै पार्टीको नाम राखेर मिलाउने,निर्वाचन चिन्ह र पार्टीको झण्डा एउटा एउटा पार्टीको राख्न दुवै पार्टी सहमत भएको उनले बताए।
सैद्धान्तिक विषयलाई महाधिवेशनबाट टुंगो लगाउने गरी बहसमा लैजान समेत दुई पार्टी सकारात्मक भएका छन्।
पार्टी एकताका लागि सरकारबाट बाहिरिन पर्ने सर्त राजापले राखेको छ। सरकारबाट बाहिरिने विषयमा कात्तिक ३० गतेदेखि बस्ने संघीय समाजवादीको बैठकले यसबारेमा निर्णय लिने जवाफ राजपालाई संघीय समाजावादी पार्टीले दिएको छ।
'हामी त संघर्षमा जानुपर्छ। सरकारमा बसेर संघर्ष हुँदैन। वैकल्पिक शक्ति बनाउनका लागि सरकारबाट बाहिर आउनुपर्छ,'महतोले भने,'सरकारले सहमति अनुसार संविधान संशोधन गरेको छैन। संविधान संशोधन नभएकै कारणले हामीले सरकारलाई दिएको समर्थन फिर्ता लिएको हो। अब समाजवादी पनि बाहिरिन पर्छ। किनकी हामीले सँगै संघर्ष गरेको हो।'
संगठनको समायोजन बराबरी हैसियतमा गर्नुपर्ने राजपाले प्रस्ताव राखेको छ।
नेतृत्को विषयमा भने अझै कसरी टुंगो लगाउने भन्नेमा दुई पार्टीबीचमा सहमति जुटन सकेको छैन।
विभिन्न विकल्पमा छलफल भए पनि कुनै टुंगो नलागेकाले अहिले केही भन्न नमिल्ने महतोले बताए ।
पार्टीको अभिभावक रहने गरी पहिलो वरीयतामा राजपा अध्यक्ष मण्डलका संयोजक महन्त ठाकुरलाई राख्न भने दुवै पार्टी सकारात्मक भएका छन् ।
विधान र घोषणापत्रका लागि दुवै पार्टीको कार्यदल बनाएर त्यसले टुंगो लगाउनेमा पनि दुई पार्टी सहमत भएका छन्।
दुई पार्टीका बीचमा राज्यको शासकीय स्वरूप र निर्वाचन प्रणालीमा पनि भिन्नता छ।
संघीय समाजवादी प्रत्यक्ष कार्यकारी राष्ट्रपति र पूर्ण समानुपातिक निर्वाचन प्रणालीको पक्षमा छ भने राजपा संसदीय व्यवस्था र मिश्रित निर्वाचन प्रणालीको पक्षमा छ।
यो विषयलाई छलफलमा लगेर महाधिवेशनबाट टुंगो लगाउने गरी छलफल चलिरहेको महतोले बताए।
संघीय समाजवादी र राजपाको एकताका लागि सबभन्दा जटिल विषय नै नेतृत्वको व्यवस्थापन बनेको छ।
६ पार्टी मिलेर बनेको राजपामा ६ जना अध्यक्ष रहेका छन्।
चक्रीय प्रणालीका आधारमा ६ जनाले पालैपालो अध्यक्ष मण्डलको नेतृत्व गर्दै आएका छन्।
संघीय समाजवादीमा भने उपेन्द्र यादव केन्द्रीय कमिटी अध्यक्ष र बाबुराम भट्टराई संघीय परिषदको अध्यक्ष रहेका छन्।
'नेतृत्वहरूको व्यवस्थापन गरेर काम बाँड्नुपर्छ। दुवै पार्टीका पदाधिकारी र केन्द्रीय कमिटीका सदस्यहरूको पनि व्यवस्थापन गर्नुपर्छ। यसमा हामी छलफल गरिरहेका छौं,'महतोले भने,'हामी सबै विषय अनौपचारिक छलफलबाटै टुंगो लगाउँछौं। मूर्त रूप दिनका लागि मात्रै औपचारिक बैठक गर्ने हो। औपचारिक बैठक बसेपछि या त एकता हुन्छ या त वार्ता भंग हुन्छ।'
पार्टी एकताका लागि संघीय समाजवादीको कात्तिक ३० को बैठकलाई कुर्ने र त्यतिबेलासम्म धेरै विषय निष्कर्षमा समेत पुग्ने महतोले बताए।
लोकतान्त्रिक वैकल्पिक शक्ति बनाउनका लागि नै एकता जरूरी रहेको भन्दै महतोले कांग्रेस र एमालेका कारण उत्पन्न भ्याकुमलाई पूरा गर्न जरूरी रहेको बताए।
'अहिलेसम्म स्वतन्त्रता र समानताको नाउमा राजनीति भइरहेको छ। आत्मसम्मान र स्वाभिमानको एजेण्डा ओझेलमा परेको छ,'उनले भने,'नेपालीको स्वाभिमान र नेपालको समृद्धिका लागि वैकल्पिक शक्ति निर्माण गर्नुपर्छ भनेर हामीले पार्टी एकताको अभियान चलाएको हो।'