सरकारले म्यानमारका स्टेट काउन्सिलर आङ सान सू चीको नेपाल भ्रमण तयारी सुरू गरेको छ।
सरकारले म्यानमारका स्टेट काउन्सिलर आङ सान सू चीको नेपाल भ्रमण तयारी सुरू गरेको हो।
राष्ट्रपति विद्या भण्डारीको हालै सम्पन्न म्यानमारको राजकीय भ्रमणका क्रममा सू चीले ‘नेपाल भ्रमण वर्ष–२०२०’ को प्रवद्र्धन गर्न नेपाल आउने चाहना व्यक्त गरेलगत्तै सरकारले तयारी सुरू गरेको हो।
सोमबार राष्ट्रपति भण्डारीको उच्चस्तरीय भ्रमण सम्पन्न गरी स्वदेश फर्किएका परराष्ट्रमन्त्री प्रदीप ज्ञवालीले त्रिभुवन अन्तराष्ट्रिय विमानस्थलमा संचारकर्मीमाझ म्यानम्यारका स्टेट काउन्सिलर सू चीले नेपाल भ्रमण वर्षको प्रवद्र्धनका लागि नेपाल आउने चाहना राष्ट्रपति समक्ष व्यक्त गरेको बताए।
सरकारले सो भ्रमणका लागि प्रबन्ध गर्ने कामलाई अघि बढाइसकेको उनले जानकारी दिए।
‘म्यानमारका स्टेट काउन्सिलर सूचीले नेपाल भ्रमण वर्षको प्रमोसन गर्न नेपाल आउने चाहना व्यक्त गर्नु भएको छ,’ संचारकर्मीले राखेका जिज्ञासाको जवाफ दिँदै मन्त्री ज्ञवालीले भने, ‘हामीले सो भ्रमणका लागि प्रबन्ध मिलाउने छौं।’
मन्त्री ज्ञवालीले सू चीको भ्रमणको मिति भने खुलाएनन्।
मन्त्री ज्ञवालीले राष्ट्रपति भण्डारीको राजकीय भ्रमणका क्रममा म्यानमारसँग सुपुर्दगी सन्धि नभएको पनि स्पष्ट पारे।
उनले नेपालले कसैको दबाबमा परेर कुनै पनि सन्धि/सम्झौता नगर्ने पटक–पटक दोहोर्याए।
राष्ट्रको हितमा उपयुक्त हुने विषयमा मात्रै अन्तराष्ट्रिय सन्धि, सम्झौता गर्ने मन्त्री ज्ञवालीको भनाइ छ।
ज्ञवालीले राष्ट्रपति भण्डारीको म्यानमारको चार दिने राजकीय भ्रमण सफल भएको बताए।
राष्ट्रपति भण्डारीको म्यानमारको राजकीय भ्रमणका क्रममा दुई मुलुकबीच पर्यटन र साँस्कृतिक सहयोग आदानप्रदानसम्बन्धी महत्वपूर्ण सम्झौता भएको थियो।
