प्रधानमन्त्री केपी शर्मा ओलीले काठमाडौंको थानकोटबाट मकवानपुरको चित्लाङ पाँच मिनेटमा पुग्ने गरी बाटो बनाउन लागिएको खुलासा गरेका छन्।
काठमाडौंको थानकोटबाट धादिङको सिस्नेखोलासम्म जाने सुरुङ मार्ग निर्माणको शिलान्यास कार्यक्रममा प्रधानमन्त्री ओलीले थानकोटबाट चित्लाङसम्म सुरूङ निर्माणको सर्वे भइरहेको बताएका हुन्।
'अलिकति समय लाग्छ। पाँच मिनेटमा यहाँ (थानकोट)बाट चित्लाङ पुगिनेछ,' ओलीले भने, 'सर्वे भइराखेको छ।’
अहिले थानकोटबाट चित्लाङ पुग्न पन्ध्र किलोमिटरको बाटोका लागि एक घण्टा समय लाग्ने गरेको छ।
चन्द्रागिरीको डाँडा कटेपछि चित्लाङ पुगिन्छ।
ओलीले सोही ठाउँमा सुरूङ बनाउन सर्वे भइरहेको बताए। प्रधानमन्त्री ओलीले नुवाकोटको बेत्रावतीबाट रसुवाको स्याफ्रुबेंसीसम्म पनि सुरूङ मार्ग निर्माण हुने बताए।
चिनियाँ राष्ट्रपतिको नेपाल भ्रमणका क्रममा केरुङ-काठमाडौं जोड्ने छोटो बाटो बनाउन सुरूङ मार्ग बनाउने समझदारी भएको छ।
चीनले पहिलो चरणमा टोखा छहरे सुरुङ मार्ग निर्माण गर्ने समझदारी भएको परराष्ट्र मन्त्री प्रदीप ज्ञवालीले सेतोपाटीसँग बताएका थिए।
उनले तीन वर्षभित्र सुरुङ बन्ने बताएका थिए।
