भारतको सर्वोच्च अदालतले केरलाको सबरिमाला मन्दिरमा रजश्वला हुने उमेरका महिलालाई प्रवेश दिने आफ्नो आदेशमा माग भएको पुनरावलोकनबारे आज निर्णय गर्दैछ।
गत वर्षको सेप्टेम्बरमा अदालतले कुनै पनि उमेरका महिलालाई मन्दिर प्रवेशमा रोक लगाउन नपाउने आदेश दिएको थियो।
त्यसअघि सबरिमाला मन्दिरमा १० देखि ५० वर्षसम्मका महिलालाई जान निषेध गरिएको थियो। सर्वोच्चको आदेशपछि केही महिला मन्दिर पसेका थिए। तर स्थानीय र भारतीय जनता पार्टीले त्यसको विरोध गरेका हो। शताब्दी पुरानो विश्वासलाई हस्तक्षेप गर्न नपाउने भन्दै सर्वोच्चको आदेशविरूद्ध आन्दोलन भएको थियो।
गत फेब्रुअरी ६ मा प्रमुख न्यायाधीश रन्जन गोगोईले विभिन्न दलसँग छलफल गरी पुनरावलोकन गर्नुपर्ने बताएका थिए। गोगोई नेतृत्वको पाँच सदस्यीय इजलासले पुनरावलोकनमाथि निर्णय दिन लागेको छ।
सर्वोच्चको आदेशमा केरला सरकारले समेत समर्थन गरेको थियो। केरेलाले मौलिक अधिकार विरुद्धको धार्मिक प्रथालाई पन्छ्याउनुपर्ने बताएको थियो। साथै महिलाहरुले पनि महिनावारीका कारणले विभेद गर्नु संविधान विपरित रहेको बताउँदै आएका छन्।