म्यानमारमा अल्पसंख्यक मुस्लिम समुदाय रोहिंग्यामाथि भएको दमनको अन्तर्राष्ट्रिय अपराध अदालत (आइसिसी)ले अनुसन्धान गर्ने भएको छ।
हेगमा मुख्यालय रहेको आइसिसीले रोहिंग्या समूदायमाथि भएको दमन र मानवताविरूद्धको अपराधबारे विस्तृत अनुसन्धान हुनुपर्ने अभियोजनकर्ताको प्रस्तावलाई बिहीबार स्वीकृत गरेको छ।
अदालतले भनेको छ- आइसिसीको क्षेत्राधिकारभित्र रहेर म्यानमारमाथि लागेको आरोपबारे छानबिन गर्न अभियोजनकर्तालाई अधिकार दिइएको छ।
म्यानमारले आइसिसीको सदस्यता लिएको छैन। म्यानमारको राखिइन प्रान्तका रोहिंग्या शरणार्थी बनेर बंगलादेश आएका छन्। बंगलादेश आइसिसीको सदस्य राष्ट्र भएकाले रोहिंग्याबारे अनुसन्धान गर्नु आफ्नो क्षेत्राधिकारमा पर्ने अदालतको तर्क छ।
अनुसन्धानका क्रममा राज्यद्वारा गरिएको संरचनात्मक हिंसा, देश निकाला र रोहिंग्याविरूद्धको जातीय र धार्मिक भेदभावको अध्ययन गरिनेछ।
गत साता ५७ वटा इस्लामिक देशको तर्फबाट अफ्रिकी मुलुक गाम्बियाले म्यानमारमा जातीय नरसंहार भएको भन्दै संयुक्त राष्ट्रसंघको अन्तर्राष्ट्रिय न्यायालय मुद्दा हालेको थियो।
सन् २०१७ मा रोहिंग्यामाथि म्यानमारको सेनाले दमन गरेको थियो। संयुक्त राष्ट्र संघीय परीवेक्षकले उक्त घटना जातीय नरसंहार भएको प्रतिवेदन दिएका थिए। सुरक्षा परिषद्ले उक्त दमनबारे आइसिसीबाट अनुसन्धान गराउनु पर्ने उनीहरूको सुझाव थियो।
हेगमा विकसित पछिल्ला घटनाक्रमबारे म्यानमारले कुनै प्रतिक्रिया दिएको छैन।