सरकार प्रवक्ता गोकुल प्रसाद बाँस्कोटाले भारतसँग सीमा विवाद विषयमा माधव कुमार नेपाललाई विशेषदूत बनाएर छलफल गर्ने विषय आफूले मिडियाबाट मात्र थाहा पाएको बताएका छन्।
बिहीबार नियमित पत्रकार सम्मेलनमार्फत् मन्त्रिपरिषद् बैठकको निर्णय सार्वजनिक गर्ने क्रममा पत्रकारको प्रश्नमा उनले विशेषदूत ‘कसैले स्ट्याटस लेख्यो भन्दैमा कुदिहाल्ने’ विषय नभएको बताए।
भारतसँग सीमा विवादबारे छलफल गर्नको लागि सरकारले माधवकुमार नेपाललाई विशेषदूत बनाएर पठाउने सञ्चार माध्यममा आएका थिए।
सीमा विवाद पुरानो विषय भएकोले राजनीतिक र कूटनीतिक तवरमा समाधान गर्नुपर्ने उनले दोहोर्याए।
उक्त विषयलाई विभिन्न ट्रयाकबाट समाधान गर्नुपर्ने उनले बताए।
‘यो पुरानो विषय हो। हामीले सत्य तथ्य आधारमा कन्भिन्स गर्नुपर्छ’, उनले भने,‘ सम्पूर्ण प्रमाण जुटाएर सार्वजनिक बहसभन्दा पनि वातावरण सहज बनाएर छलफल गर्नुपर्छ।’
विशेषदूत अहिल्यै नबनाउने उनले संकेत गरे।
‘विशेषदूत जुन दिन हुन्छ त्यो दिन थाहा पाउनु हुन्छ’, उनले भने।