बेलायतमा बिहीबार भएको आमनिर्वाचनमा कन्जरभेटिभ पार्टीले स्पष्ट बहुमत ल्याएको छ।
शुक्रबार अपरान्हसम्म अधिकांश स्थानको मतगणना भइसकेको छ।
बेलायती प्रसारण संस्था (बिबिसी) का अनुसार चुनाव भएका ६ सय ४२ सिटमध्ये प्रधानमन्त्री बोरिस जोन्सनको कन्जरभेटिभ पार्टीले ३५८ सिट जितिसकेको छ। उसले अझै केही सिट जित्ने बताइएको छ। बहुमतका लागि ३२६ सिट भए पुग्छ।
अक्टोबर ३१ सम्म बेलायतलाई युरोपियन युनियन इयूबाट बाहिर निकाल्ने वाचा गरेर प्रधानमन्त्री बनेका जोन्सनले उक्त योजनामा सफलता नपाएपछि चुनाव घोषणा गरेका थिए।
चुनावबाट कन्जरभेटिभ पार्टीलाई ३२ वर्षमै सबैभन्दा बढी सिट हात परेको छ। सन् १९८७मा मार्गेट थ्याचर प्रधानमन्त्री भएपछि कन्जरभेटिभ पार्टीले तल्लो सदनमा यति धेरै सिट जितेको थिएन।
प्रतिपक्षी लेबर पार्टीले भने २०३ सिटमात्र हात पारेको छ। आफ्नो परम्परागत प्रभाव क्षेत्रमा पनि हार व्यहोरेको लेबर पार्टीले यसपालि ८५ वर्षकै सबैभन्दा कम सिट पाएको हो।
आफ्नो पक्षमा स्पष्ट बहुमत आएपछि प्रधानमन्त्री जोन्सनले बेलायतलाई इयूबाट बाहिरिने स्पष्ट जनादेश प्राप्त भएको बताए। उनले अर्को महिना बेलायत इयूबाट बाहिरिने बताए।
प्रधानमन्त्री हुनुअघिदेखि नै जोन्सनको प्रशंसा गर्दै आएका अमेरिकी राष्ट्रपति डोनाल्ड ट्रम्पले जितका लागि जोन्सनलाई बधाई दिएका छन्।
उनले बेलायत इयूबाट बाहिरिएसँगै अमेरिका र बेलायत नयाँ व्यापार सम्झौता गर्न स्वतन्त्र हुने बताएका छन्।
‘इयूमा हुँदा गरिने सम्झौताभन्दा यो सम्झौता निकै ठूलो र फाइदाजनक हुनेछ,’ ट्रम्पले भनेका छन्।
बेलायतमा इयूबाट बाहिरिनेबारे सन् २०१६ मा जनमत संग्रह भएको थियो। त्यसपछि ब्रेजिक्ट पक्षधर कन्जरभेटिभ पार्टी सत्तामा आए पनि संसदमा स्पष्ट बहुमत ब्रेजिक्टमा अवरोध भएको थियो।
