काठमाडौं महानगरपालिकाका मेयर विद्यासुन्दर शाक्यले 'अकुपाई टुँडिखेल' अभियानलाई राजनीतिक 'स्टन्ट' भएको टिप्पणी गरेका छन्।
महानगरको २५ औं स्थापना दिवसका अवसरमा शुक्रबार आयोजित पत्रकार सम्मेलनमा मेयर शाक्यले पत्रपत्रिकामा अनुहार देखाउन मात्रै भए पनि कार्ड भिरेर भिडमा मिसिएको आरोप लगाएका हुन्।
टुँडिखेललाई अतिक्रमण मुक्त गराउन विगत पाँच सातादेखि चलिरहेको अकुपाई टुँडिखेल अभियानबारे सम्मेलनमा मेयर शाक्यलाई प्रश्न गर्दा उनले यस्तो अभिव्यक्ति दिएका हुन्।
'अभियानलाई प्रभावकारी बनाउन नयाँ नयाँ एजेन्डा थपिँदै गयो, कतिपयको राजनीतिक खेल पनि होला,' मेयर शाक्यले भने, 'भोलिको प्रभाव पनि हेर्नुपर्छ। आज मात्रै आन्दोलन गरेर हुँदैन।'
टुँडिखेल कुनै पनि हिसाबमा अतिक्रमण नभएको शाक्यको दावी छ। टुँडिखेल अतिक्रमण भएको देख्नेले बसन्तपुर, झोँछे नदेखेको उनको भनाइ थियो।
'टुँडिखेल खुलै छ, कसैले ओगटेको छैन, धरहरा र वीर अस्पताल सरकारकै हो, त्यसैको निर्माण सामग्री केही समयका लागि राखिएको मात्रै हो,' शाक्यले भने, 'स्थानीय सरकार नआउँदै केन्द्रीय सरकारले गरेको निर्णय हो यो। अहिले हामीलाई मात्रै दोष दिन मिल्दैन।'
शाक्यले हाल अस्तव्यस्त टुँडिखेल केही समयपछि पुरानै अवस्थामा फर्कने आश्वासन दिए।
