डेढ वर्षअघि सुरू भएको संसारका दुई शक्तिशाली अर्थतन्त्र अमेरिका र चीनबीचको व्यापार युद्धमा ब्रेक लागेको छ।
बुधबार दुई देशबीच पहिलो चरणको सम्झौतामा हस्ताक्षर भएसँगै व्यापार युद्ध मत्थर हुने भएको हो।
सम्झौता गर्न चीनका प्रमुख व्यापार वार्ताकार तथा उपप्रधानमन्त्री लिउ हे वासिङटन पुगेका थिए। अमेरिकाका तर्फबाट सम्झौतामा राष्ट्रपति डोनाल्ड ट्रम्पले नै हस्ताक्षर गरेका छन्।
यी दुई देशबीच सन् २०१८ जुलाईदेखि एकअर्काका सामानमा कर थपेर व्यापार युद्ध सुरू भएको थियो। विभिन्न चरणमा भएका वार्ताहरू अवरूद्ध भएर फेरि सुरू हुँदै डेढ वर्षमा पहिलो चरणको सम्झौता भएको हो।
यो सम्झौतामा दुबै पक्षले यसअघि एकअर्काका सामानमा थपेका कर भने हटाएका छैनन्।
सम्झौताअनुसार बेइजिङले आगामी दुई वर्षमा सन् २०१७मा अमेरिकाबाट किनेको भन्दा २ सय अर्ब बढी डलरको सामान र सेवा किन्ने भएको छ भने अमेरिकाले केही चिनियाँ सामानमा लगाएको कर घटाउने र गत डिसेम्बरबाट थप सामानमा लगाउने भनेको कर नलगाउने भएको छ।
चीनले ५४ अर्बको उर्जा, ७८ अर्बको उत्पादन, ३२ अर्बको कृषि सामग्री र ३८ अर्ब डलरको थप सेवा अमेरिकाबाट किन्ने प्रतिवद्धता जनाएको छ।
चिनियाँ वार्ताकार हेले बजारको अवस्था हेरेर चीनले आगामी दुई वर्षमा ४० अर्ब डलरको कृषि उत्पादन अमेरिकाबाट किन्ने बताए। अमेरिकाबाट ठूलोमात्रामा सोयबिन चीन निर्यात हुन्छ।
एक घन्टाभन्दा बढी चलेको हस्ताक्षर समारोहमा चिनियाँ राष्ट्रपति सी चिनफिङले पठाएको पत्र पढेर सुनाइएको थियो। पत्रमा सीले पहिलो चरणको सम्झौताले अमेरिका र चीन आफ्ना समस्या वार्ताका माध्यमबाट समाधान गर्न सक्छन् भन्ने सन्देश दिएको उल्लेख गरेका छन्।
ह्वाइट हाउसको इस्ट रूममा ठूलो संख्यामा उपस्थित सांसद, उद्योगी, व्यापारी, पत्रकार र सरोकारवालाहरूलाई सम्बोधन गर्दै ट्रम्पले सम्झौता चीनसँगको व्यापार सम्बन्धमा यसअघि कहिल्यै नभएको कदम भएको बताए।
उनले आफू छिट्टै बेइजिङ जाने र राष्ट्रपति सीलाई पनि भेट्ने उल्लेख गरे।
चिनियाँमा वित्तीय बजारमा सहज पहुँच, प्रतिलिपी अधिकारका विषयमा सम्झौतामा केही समावेश छैन। यसको अर्थ विवाद साम्य पार्न दुई देशले अझै गहन वार्ता गर्नुपर्ने देखिन्छ।
तत्कालका लागि भने यो सम्झौता ट्रम्पलाई यही वर्ष हुने राष्ट्रपतीय निर्वाचनमा आफ्नो उपलब्धिका रूपमा देखाउने अर्को काम भएको विश्लेषकहरूले बताएका छन्।
अमेरिका र चीनबीच सम्झौता भएसँगै विश्वका विभिन्न सेयरबजार उकालो लागेका छन्।