प्रधानमन्त्री तथा नेपाल कम्युनिष्ट पार्टी नेकपाका अध्यक्ष केपी शर्मा ओलीले वर्तमान सरकारले लिम्पियाधुरा नेपालको भूभाग हो भनेर भारतलाई पत्राचार गर्ने पहिलो सरकार भएको बताएका छन्।
बुधबार नेकपाको केन्द्रीय कमिटीको पूर्ण बैठकमा उनले यो भन्दाअघि कुनै पनि सरकारले यसबारे कुरा नउठाएको बताएका हुन्।
'पहिलो पटक नेपाल सरकारले लिम्पियाधुरा हाम्रो हो भनेर भारतलाई आधिकारिक पत्राचार गरेको हो,'उनले भने,'त्यसभन्दा अघि लिम्पियाधुरा हाम्रो हो भनेर पत्राचार गरेको थिएन, दाबी गरेको थिएन।'
भारत सरकारले २०१९ नोभेम्बरको पहिलो सातामा जारी गरेको राजनीतिक नक्सामा लिम्पियाधुरा, कालापानी समावेश गरिएको थियो।
उक्त नक्साले सुगौली सन्धीको धारा ५ को विरूद्धमा रहेको र नेपाल सरकारको असहमति रहेको हुँदा तुरुन्तै सच्याउन आग्रह समेत गरेको उनले बताए।
त्यस्तै, अध्यक्ष ओलीले लिपुलेक, कालापानी र लिम्पियाधुरा समेतको भूभाग नेपालमा पर्ने तथ्य प्रमाणहरू रहेको दाबी गरेका छन्।
त्यही तथ्य प्रमाणको आधारमा नेपालको भू-भाग रहेको दाबी गर्दै संवादको प्रक्रिया अगाडि बढाएको समेत भएको उनले बताए।
