काभ्रेको पाँचखाल नगरपालिकाले आर्थिक वर्षको छ महिनामा आधा योजना पनि सम्झौता गर्न सकेको छैन।
नगरका विभिन्न कार्यपालिका बैठकबाट निर्णय भएका ३०१ विकासे योजनामध्ये आवको आधा वर्षमा १२५ योजना मात्रै सम्झौता हुन सकेका हुन्।
आर्थिक वर्षको छ महिनामा करिब ५० प्रतिशत योजना सम्झौता हुनुपर्नेमा हाल करिब ४२ प्रतिशत मात्रै योजना सम्झौता भएको पाइएको छ। हालसम्म सम्झौता भएका योजनामध्ये ४१ योजना अर्थात् करिब १३ प्रतिशत योजनाको मात्रै भुक्तानी गरिएको नगरसभामा सार्वजनिक अर्धवार्षिक प्रगति विवरणमा उल्लेख गरिएको छ।
सम्झौता प्रक्रियाको यहीँ अभ्यास हुँदै जाने हो भने चालू आवमा सो नगरको योजना सम्पन्न हुनेमा आशङ्का पैदा हुन थालेको छ। नगरप्रमुख महेश खरेलले भने नगरपालिका कार्यालयले सन्तोषजनक प्रगति भइरहेको बताए।
'हामीले कृषि नगरको नारालाई सार्थकता दिन औद्योगिक विकासका माध्यमले रोजगार प्रवद्र्धन गर्नेछौँ,' उनले भने।
उनले कृषि, औद्योगिक तथा भेटेरीनरी कार्यक्रमबाट थप तीन हजार रोजगारी सिर्जना गर्ने योजना रहेको सुनाए। 'हाम्रा योजना महत्वकाङ्क्षी भए पनि क्रमशः कार्यान्वयनको चरणमा जानेछौँ,' उनले भने।
चालू आवको छ महिनामा केही कमै योजना सम्झौता भए पनि माघ महिनादेखि तीव्र गतिमा योजना सम्झौताको काम भएको उनले बताए।
संघ र प्रदेश सरकारको समन्वयमा जिल्लास्थित बिपी राजमार्ग र अरनिको राजमार्गसँग जोडिएका नगरका भित्री क्षेत्रमा सडक कालोपत्र गर्न थालिएको र पाँचखालको पुरातात्विक क्षेत्रको संरक्षण एवं प्रवर्द्धनमा लागिएकाले योजनाले निरन्तरता पाइरहेको नगरप्रमुख खरेलले प्रष्ट्याए।
पाँचखालको योजना सम्झौता ढिलाइ हुनुमा केही समयदेखि वडास्तरमा प्राविधिक पर्याप्त नहुनु रहेको प्रमुख प्रशासकीय अधिकृत लोकबहादुर भण्डारीले बताए। वडास्तरका उपभोक्ता समितिले कामलाई तीव्रता नदिनु पनि अर्का कारण रहेको उनको भनाइ छ।
'भुक्तानी माग गरेकालाई रोकेका छैनौँ, केही योजनाको झुक्तानी माग नगर्दा कम भुक्तानी देखिएको हुनसक्छ,' उनले भने। नगरले भने हाल १५ लाख रुपैयाँमाथिका योजनामा ‘इ–बीडिङ’ गर्ने योजना अघि सारेको छ।
