प्रधानमन्त्री केपी शर्मा ओलीले चीन सरकारले नेपालीहरूलाई आरामसँग राखेकोले आत्तिनु नपर्ने बताएका छन्।
चीनको वुहानमा फैलिएको कोरोनाभाइरसबाट मानिसहरूको मृत्यु भइरहेको र नेपालीलाई उद्धार गर्नुपर्ने आवाज उठिरहेका बेला प्रधानमन्त्री ओलीले चीनमा रहेका नेपाली आरामसँग बसिरहेको बताए।
‘नेपाली विद्यार्थी र अरू नेपालीलाई चीनले फरक ठाउँमा राखेको छ। उहाँहरू आरामसँग बस्नुभएको छ,’ सत्तारूढ नेपाल कम्युनिष्ट पार्टी नेकपाको केन्द्रीय कमिटी बैठकमा आइतबार बोल्दै प्रधानमन्त्री ओलीले भने, ‘अहिले आत्तिनुपर्ने अवस्था छैन।’
यो पनि:
वुहानमा कोठाभित्रै ‘थुनिएका’ नेपाली (भिडिओ)
आवश्यक परेमा चीनमा रहेका नेपालीहरू उद्धार गरिने प्रधानमन्त्री ओलीले बताए। ‘आवश्यक परेमा सरकारले उद्धार गर्छ,’ उनले भने।
चीनमा फैलिएको कोरोनाभाइरस संक्रमण अहिलेसम्म प्रमाणित रूपमा नेपालमा नदेखिएको प्रधानमन्त्रीले बताए।
‘हामी त्रसित होइन, कोरोनाभाइरसबाट हामी सचेत हुनुपर्ने अवस्था छ,’ प्रधानमन्त्री ओलीले भने। उनले भिडभाडमा जाँदा मास्क लगाएर हिड्न, साबुनपानीले हात धुने बानी गर्न पनि आग्रह गरेका छन्।
‘मास्क प्रयोग गर्ने आदत बसाल्नुपर्छ, साबुन पानीले हात धुनुपर्छ,’ उनले भने, ‘मुख छोपेरमात्रै हाच्छु गर्नुपर्छ। साधारण लाग्ने तर यो महत्वपूर्ण कुरा हो।’
उनले कोरोनाभाइरस संक्रमणको जोखिमबाट बच्न सरकारले काम गरिरहेको पनि बताए।
‘सरकारले काम गरिरहेको छ। स्वास्थ्य मन्त्रालय, रेडक्रसलगायत संस्थाले काम गरिरहेका छन्। सजकता र चेतना जगाउने कार्यक्रम गर्नुपर्छ,’ प्रधानमन्त्री ओलीले भने।
