प्रधानमन्त्री केपी शर्मा ओलीले सरकारले अघि सारेका विकास निर्माणको कामलाई सञ्चार माध्यमले प्राथमिकता नदिएको गुनासो गरेका छन्।
सञ्चार माध्यमको भूमिका, सञ्चार माध्यममा आएका समाचारप्रति सधैं असन्तुष्टि जनाउँदै आएका प्रधानमन्त्री ओलीले सोमबार काठमाडौंमा आयोजित कार्यक्रममा पनि सञ्चार माध्यमले दिने गरेको प्राथमिकताको विषयमा गुनासो गर्न बिर्सिएनन्।
काठमाडौं उपत्यका विद्युत् वितरण प्रणाली भूमिगत तथा सुदृढीकरण कार्यको उद्घाटन समारोहलाई सम्बोधन गर्दै प्रधानमन्त्री ओलीले प्रविधिको सुरूआत भएको समाचार दिनुको सट्टा केही सञ्चार माध्यमले फेरि पनि बाँसुरी नै बजाएको समाचार दिने बताए।
आफूले भनेको विषयलाई हुबहु नराखेर तोडमोड गरी अर्नगल प्रचार गर्ने गरिएको दुखेसो पनि गरे।
उनले भने, ‘कुनै कुनै सञ्चार माध्यमले यो न्युज दिनभन्दा बाँसुरी बजाएको न्युज दिन्छन् भोलि पनि। दया लाग्छ। देश विकास हुन लाग्दा पिर किन परेको त्यो छक्क लाग्छ। कुनै कुनै भन्ने शब्द प्रयोग गर्या छु। कुनै कुनै भन्ने शब्द बिर्सन्छन् अनि यसो भन्यो भनेर कुनै कुनै शब्द काटेर पठाउँछन्। भोलि पनि हेर्नुहोला बाँसुरी बजाएको फोटो छाप्छन्। यो फोटै छाप्दैनन्।’
उनले बुद्धिजीवीको बौद्धिकता देख्दा दया लाग्ने गरेको बताए।
सरकार देश विकासमा अघि बढिरहेका बेला सहकार्य गर्नुको सट्टा केहीले मजाकको विषय बनाउने गरेको गुनासो पनि उनले गरे।
आफूले तुइन विस्तापित गर्छु भन्दै प्रगति पेस गर्दैगर्दा सञ्चार माध्यमले दार्चुला पुगेर भए पनि तुइनको फोटो खिचेर छाप्ने गरेको गुनासो पनि उनले गरे।
उनले भने, ‘मैले देखें एक जना बुद्धिजीवीले नधम्क्याउनुहोस् प्लीज भनेर भनेको, मैले धम्क्याएरै हैरान पारेँ अरे। अनि मलाई चाहिँ यो बौद्धिकता देख्दा दया लाग्छ। देश विकास मजाक होइन। देश विकास आग्रह पूर्वाग्रहको विषय होइन। देश विकास साझा अभिभारा हो। साझा कर्तव्य हो। हामी विकास गरिरहेका छौं भने खुसी हुनुपर्ने। तुइन विस्थापित भएकोमा रुवाबासी छ कतिको। अचम्म लाग्छ। दार्चुला पुगेर फोटो खिचेर ल्याउँछन्। दुइटा तुइन विस्थापित गर्न बाँकी छ त्यहाँ। कति दु:ख गर्या होला? कठै बरी।’
उनले सरकारको विकास निर्माण र सुशासनका काम देखेर खुसी हुनुपर्नेमा पिर किन परेको? भनी प्रश्न गरे।
उनले काठमाडौं उपत्यकाको विद्युत् वितरण प्रणालीलाई भूमिगत सुदृढीकरण र स्वचालित गर्ने काम रातिमा गरिने भएकाले त्यसले कसैलाई असर नगर्ने स्पष्ट पारे।
उनले भने, ‘सर्वसाधारण कोही पनि, कसैलाई पनि यसले दु:ख दिँदैन। किन भने यो काम आज सुरू मात्रै दिउँसो गरिएको हो। सबैले देखुँन् भनेर। सुरू भएको जानकारी होस् भनेर। पत्रकारको पनि निद्रा नबिगारुँ भनेर।’ प्रधानमन्त्री ओलीले दिनहुँ मुलुक नयाँ प्रविधिको प्रयोगमार्फत् विकास र सेवाका लागि सर्मपित हुँदै गएको भन्दै आइतबार आफूले झापामा गरेको पुल ,बाटोको उद्घाटन तथा शिलान्यासको फेयरिस्त पनि प्रस्तुत गरेका थिए।