प्रमुख प्रतिपक्षी दल नेपाली कांग्रेसका सांसदहरुले सेक्युरिटी प्रिन्टिङ प्रेस स्थापनाका लागि पुर्व सञ्चारमन्त्री गोकुल बाँस्कोटा संलग्न भनिएको अडिओ सामाग्रीको सत्य तथ्य सदनलाई जानकारी गराउन माग गरेका छन्।
प्रतिनिधिसभाको बुधबारको बैठकको शून्य समयमा बोल्दै कांग्रेसका सांसदहरूले मन्त्री संलग्न भनिएको घटना लगायतका पछिल्ला घटनाबारे सदनलाई स्पष्ट पार्न प्रधानमन्त्रीको ध्यानाकर्षण गराए।
सांसद राजेन्द्र कुमार केसीले ७० करोड कमिसन लगायत पछिल्ला घटनाबारे सदनलाई जानकारी गराउन माग गरे। सेक्युरिटी प्रिन्टिङ प्रेसमा भएको भनिएको ७० करोडको कमिसनको सामाग्रीका बारेमा सरकार जवाफदेही नभएको भन्दै उनले आक्रोश पोखे।
उनले भने ‘जस लिन २/२ घण्टा रोष्टम कब्जा गर्ने प्रधानमन्त्रीजी आज यत्रो ठूलो काण्ड मच्चिदा उहाँले जवाफ दिनु पर्ने कि नपर्ने?’
सांसद रामबहादुर विष्टले बाँस्कोटाको अडियो प्रकरणबारे सरकारले सदनलाई स्पष्ट नभनेको भन्दै आपत्ति जनाए।
सांसद रंगमति शाहीले नेपाल वायु सेवाको उडान बन्द हुँदा कर्णालीबासी समस्यामा परेको भन्दै उडान सुचारू गराउन सरकारको ध्यानाकर्षण गराइन्। जन्मदिन मनाउन हेलिकोप्टर चार्टर गरेका प्रधानमन्त्रीलाई सिटामोल नपाएर ज्यान गुमाएका हुम्लाका जनताको माया लागेन? भनी उनले प्रश्न गरिन्।
उनले भनिन् ‘प्रधानमन्त्री ज्यु तपाईले बर्थ डेको केक बोक्ने हेलिकोप्टर चार्टर गरेर खर्च गर्न अलिकति पनि अप्ठ्यारो लागेन यही जाडोमा सिटामोल नपाएर हुम्लामा १४ जनाले ज्यान गुमाउनुपर्यो, सुत्केरी हुन नसकेर महिलाहरू छटपटाई मर्नुपर्यो। बरु केक चार्टर गर्नुभन्दा औषधिको चार्टर गरेर त्यो हेलिकप्टर हुम्ला पठाइदिउँ, जनता बचाउनुपर्छ भनेर अलिकति पनि तपाईलाई माया लागेन?’
सांसद मिना बुढाले ‘७० करोड सेक्युरिटी प्रिन्टिङ प्रेस निर्माण लगायत अरबौं भ्रष्टाचार भइरहँदा किन चुप बस्छन् प्रधानमन्त्री?’ भनी प्रश्न गरिन्।
सांसद बिमला नेपालीले आफ्ना संसदीय दलका नेता शेरबहादुर देउवाले भारतले अतिक्रमण गरेका लिम्पियाधुरा, लिपुलेक लगायत भू–भागलाई तत्काल नेपालको नक्सामा पार्न सरकारलाई दिएको ऐक्यवता कार्यान्वयन हुन नसकेको भन्दै प्रधानमन्त्रीको ध्यानाकर्षण गराइन्।
सांसद मिनबहाहदुर विश्वकर्माले तारकेश्वर नगरपालिका वडा नम्बर १० स्थित श्रीकृष्ण विडारीको घरमा डेरा बस्ने कैलाली धनगढी निवासी दिपा नेपालीलाई दलित समुदायकी भएको थाहा पाएपछि घरवेटीले घर खाली गर्न भनेर यातना दिने गरेको भन्दै संविधानको धारा २४, जातीय भेदभाव र छुवाछुत कसुर सजाय ऐन अनुसार कारवाही गर्न सरकारको ध्यानाकर्षण गराए।
सांसद भवानीप्रसाद खापुङले कालाबजारी, कमिसनखोर, तस्कर, हत्यारा र भ्रष्ट्राचारीहरुले धमिराले आए जस्तो मुलुकलाई भित्र भित्र खोक्रो बनाइरहेको भन्दै त्यसतर्फ सरकारको ध्यानाकर्षण गराए।