प्रदेश २ का मुख्यमन्त्री लालबाबु राउतले संघीयता कार्यान्वयनको लागि संघीय सरकारबाट इमान्दार प्रयास हुन नसकेको बताएका छन्।
मानव अधिकार पत्रकार संघले आज जनकपुरधाममा आयोजना गरेको संघीयता कार्यान्वयनमा सरोकारवालाको भूमिका विषयक कार्यशालामा मुख्यमन्त्री राउतले विविधता भित्रको एकतालाई दर्शाउन मुलुकमा संघीयता ल्याइए पनि कार्यान्वयन गर्ने पक्ष संघीय सरकार इमान्दार हुन नसकेको बताए।
संघीयता कार्यान्वयनको लागि सबभन्दा महत्वपूर्ण पक्ष रहेको प्रदेशलाई कमजोर बनाउन विभिन्न चलखेल भई रहेको उल्लेख गर्दै उनले भने, ‘सुरूमा कामै नलाग्ने कर्मचारी पठाइयो, बजेटको बाँडफाँट पनि अन्यायपूर्ण भयो। कसरी संघीयता कार्यान्वयन हुन्छ?’
केन्द्रिकृत एकात्मक सोच बोक्नेहरू संघीयतालाई कमजोर गर्ने जति प्रयास गरे पनि अबको पाँच वर्षमा मुलुक कोल्टो फेर्नेमा आफू विश्वस्त रहेको उनको दाबी छ।
उनले भने, ‘गाँउ-गाँउमा विकासको आभास भइरहेको छ, जनताको घर-घरमा प्रदेश सरकारको अनुभूति गराउने काम भइरहेको छ।’
