प्रमुख प्रतिपक्षी नेपाली कांग्रेसले लकडाउनको निर्णय सही भएको बताएको छ।
कोरोनाभाइरस संक्रमणको जोखिमबाट बच्न लकडाउनलाई सहजतापूर्वक लिन पनि कांग्रेसले आग्रह गरेको छ।
प्रवक्ता विश्वप्रकाश शर्माले सरकार र समुदायका नाममा कांग्रेसले सात बुँदामा सुझाव दिएका छन्।
‘सरकारले घोषणा गरेको लकडाउनको निर्णय सही छ। ठूलो जोखिमबाट बच्न सानो कष्टलाई सहजतापूर्वक लिऔं, यो हाम्रै लागि हो,’ शर्माले भनेका छन्।
यस्ता छन् कांग्रेसका सुझाव:
१.‘लकडाउन’को अवधि सात दिनबाट लम्बिन पनि सक्छ। त्यस्तो स्थितिमा ‘दिनभरि काम गरेर माम जुटाउने वर्ग’ को चुल्हो यो लकडाउनले पूरै ‘लक’गर्न सक्छl अत सरकारले यथाशीघ्र राहतको प्याकेज निर्माण गरेर कार्यान्वयनको प्रक्रिया सुनिश्चित गर्नु दूरदर्शिता हुनेछl
२. जोखिमसँग जुध्न दैनिक रूपमा सही सूचना र तथ्यहरू सम्प्रेषण गर्ने कार्यमा सरकारले एकद्वार प्रणाली तत्काल निश्चित गर्नु पर्दछl जसले नागरिक पंक्तिमा निरन्तर ढाडससँगै उच्च मनोबलको साथ रहनेछl समुदायले सतर्कता राख्दै साथ दिएर यो संघर्षलाई सफल बनाउनु छl
३. खाद्यान्न अभाव र असहजता हुन सक्ने स्थिति आउन नदिन संघीय सरकारले तीनै तहको सरकारबीच उचित समन्वय साथ सुलभ स्थिति बनाउन र नागरिकलाई निरन्तर आश्वस्त बनाउन जरूरी छl
४. `सेल्फ क्वारेन्टाइन´ मा बस्ने जो कसैलाई पनि कोरोनासम्बन्धी निश्चित लक्षण देखिए, सम्पर्क कहाँ गर्ने, तिनलाई अस्पताल कसरी कहाँ पुर्याइने र उपचार प्रक्रियाको सहजता के हुने, जस्ता अन्यौल सरकारले यथाशीघ्र चिर्न जरूरी छl
५. यो `तेस्रो विश्वयुद्ध´ संसारले स्वास्थ्यकर्मीहरूको नेतृत्वमा लड्नुपरेको छ। अत स्वास्थ्यकर्मीहरूको उच्च मनोबल राख्न, पर्याप्त पिपिइ प्रबन्ध गर्न र प्रयोगशाला कम्तीमा सात प्रदेशमै प्रबन्ध गरेर परीक्षण सहज बनाउन सरकारले तीव्र कार्य गर्नु पर्दछl
६.‘लकडाउन’ले सबै थरी व्यवसायलाई गम्भीर असर पुग्ने स्थिति दृष्टिगत गरेर सरकारले, व्यवसायीको बैंकिङ ब्याज घटाउने र किस्ता तिर्ने समयावधि लम्ब्याउन समन्वयको भूमिका यथाशीघ्र निर्वाह गर्नु पर्दछ।
७. एकातर्फ हामी पूरै देश ‘लकडाउन’ मा गएका छौं भने अर्कातर्फ लाखौं नेपाली विदेशी भूमिमा `लक्ड´ स्थितिमा छन्। तिनको अभिभावक मूलत मातृभूमि नेपाल नै होl सरकारले विविध माध्यमबाट प्रवासी नेपालीको सहजताका लागि भूमिका निर्वाह गर्न जरूरी छl
