सरकारले ६० वर्ष माथिका दीर्घरोगका बिरामीहरूमा कोरोना भाइरस संक्रमण परीक्षण गर्ने भएको छ।
मधुमेह र रक्तचाप भएका तथा आइसियुमा रहेका ६० वर्षमाथिका व्यक्तिको पनि कोरोना परीक्षण गरिने स्वास्थ्य मन्त्रालयका प्रवक्ता डा. विकास देवकोटाले जानकारी दिए। 'कोरोना परीक्षणको दायरा अब फराकिलो हुन्छ,' उनले भने।
सरकारले ठूला अस्पतालहरूलाई कोरोनाका शंकास्पद बिरामी उपचार गर्न आए अरू अस्पताल रेफर नगर्न पनि निर्देशन दिएको छ। प्रवक्ता देवकोटाका अनुसार, अब ठूला अस्पतालहरूले बिरामीलाई आफ्नै आइसोलेसनमा राखेर नमूना परीक्षण गर्न प्रयोगशालामा पठाउनुपर्ने छ।
यसका लागि सरकारले यसअघि नै ठूला अस्पतालहरूलाई छुट्टै 'फिबर क्लिनिक' र 'आइसोलेसन वार्ड' बनाउन निर्देशन दिएको थियो। निजी अस्पतालहरूले भने कोरोनाका शंकास्पद बिरामी जाँच्न नसक्ने बताउँदै आएका छन्। ती अस्पतालले पिपिई लगायत सामग्री अभाव रहेको भन्दै बिरामी राख्न नसकिने बताएका छन्।
