सर्वोच्च अदालतले बन्दीप्रत्यक्षीकरण रिट लिएर आएका विप्लव समूहका दुई नेतालाई थुनामुक्त गर्ने आदेश गरेको छ।
न्यायाधीश टंकबहादुर मोक्तान र प्रकाश कुमार ढुंगानाको इजलासले विप्लवका नेता धिरिन्द्र कुमारी उपाध्याय र नविन विश्वकर्मालाई थुनामुक्त गर्न आदेश दिएको हो।
धिरिन्द्राको हकमा शर्मिला उपाध्याय र नविनको हकमा एकता विश्वकर्माले उनीहरूलाई सरकारले गैरकानुनी रूपमा थुनेको भन्दै चैत ९ गते बन्दीप्रत्यक्षीकरणको रिट हालेका थिए।
उनीहरूमाथि काठमाडौं लगायतका विभिन्न ठाउँमा बम विष्फोट गराएको, ज्यान मार्ने कसूर गरेको र राज्यविरूद्धको अपराध गरेको भन्दै प्रहरीले मुद्दा चलाइएको थियो।
जिल्ला अदालतले उनीहरूलाई थुनामा राखेर मुद्दाको पुर्पक्ष गर्न भन्यो। उक्त आदेश विरूद्ध उनीहरू पाटन उच्च अदालत गएका थिए। गएको माघमा उच्च अदालतले भने प्राप्त प्रमाणबाट ती कसूरमा यिनीहरूको प्रत्यक्ष भूमिका नदेखिएको भन्दै साधारण तारेखमा राख्ने आदेश दिएको थियो।
त्यसपछि उनीहरूलाई प्रहरीले फेरि पक्राउ गर्यो त्यसपछि उनीहरूका आफन्त बन्दीप्रत्यक्षीकरणको रिट लिएर सर्वोच्च गएका हुन्।
विप्लवका कार्यकर्तालाई छोड्ने बित्तिकै अदालतकै गेटबाट पक्राउ गर्ने प्रहरीको रवैया बढेपछि केही समयअघि सर्वोच्च अदालतले आइजिपी ठाकुर ज्ञवालीलगायत उपत्यकाका चार प्रहरी अधिकारीलाई अदालतको अवहेलना गरेको भनेर किन कारबाही नगर्ने जवाफ दिन भनेको थियो।
फागुनमा अदालतले चारै जनालाई अदालतमै उपस्थित भएर लिखित जवाफ बुझाउन भनेको थियो।
थुनामुक्त भएका विप्लव कार्यकर्तालाई अदालत परिसरबाट पक्राउ नगरी अरू ठाउँबाटै कानुन बमोजिम पक्राउ गरेको लिखित जवाफ लिएर आइजिपी ज्ञवाली सर्वोच्च अदालतमा पुगेका थिए।
.JPG)
