चीनबाट स्वास्थ्य सामग्री ल्याउनुपूर्व नै प्रदेशहरूले आफूलाई चाहिने स्वास्थ्य सामग्रीको सूची केन्द्रलाई पठाएको थियो। जसमा प्रदेश-१ ले पहिलो लटमा १० हजार पर्सनल प्रोटेक्टिभ इक्विपमेन्ट (पिपिई) माग गरेको थियो।
तर सरकारले सातै प्रदेशमा एक हजारको दरले पिपिई पठाएको छ।
'केही नहुनुभन्दा यति हुनु पनि राम्रो हो। पहिले हामीसँग तीन सय मात्र पिपिई थियो। अलिकति भए पनि धेरै त भयो,' प्रदेश-१ का सामाजिक विकास मन्त्री जीवन घिमिरेले सेतोपाटीसँग भने।
मन्त्री घिमिरेले केन्द्रबाट प्राप्त एक हजार पिपिई प्रदेशका ठूला अस्पताल लगायत सबै स्थानीय तहमा वितरण गरिएको बताए। जसमा कोशी अस्पताल, बिराटनगर र धरानको बिपी अस्पताललाई समान १ सय ५०, बिराटनगरस्थित कोरोना विशेष अस्पताललाई २ सय, मेची अस्पताललाई ५० वटा पिपिई वितरण गरिएको छ। बाँकी भने जिल्लाका स्थानीय तहलाई वितरण गरिएको मन्त्री घिमिरेले जानकारी दिए।
उनले प्रदेश-१ मा जम्मा ५० हजार पिपिई आवश्यकता रहेको बताए। सरकारले कोरोना भाइरस रोकथाम र उपचारमा प्रयोग हुने स्वास्थ्य सामग्री चीनबाट ल्याएको हो। सरकारले आजै सेनाको स्काइ ट्रकबाट बिराटनगर, सुर्खेत र धनगढीमा स्वास्थ्य सामग्री पठाएको हो। बाँकी चारवटा प्रदेशमा भने सरकारले गाडीबाट सामग्री पठाएको हो।
मन्त्री घिमिरेले केही सामान गाडीबाट पनि आउन लागेको जानकारी दिए। कोरोना रोकथाम र उपचारका लागि पिपिई र परीक्षण गर्ने 'पोर्टेबल पिसिआर मेसिन' अहिलेको मुख्य आवश्यकता हो।
देशभर खटिरहेका स्वास्थ्यकर्मीले पिपिई अभाव रहेको बताउँदै आएका छन्। साथै विज्ञहरूले नेपालमा संक्रमण बढिरहेको भन्दै सरकारले परीक्षणको दायरा बढाउनुपर्ने जोड दिएका छन्।
सुदूरपश्चिम प्रदेशका सामाजिक विकास मन्त्री कृष्णराज सुवेदीले पनि मागअनुसार स्वास्थ्य सामग्री नआएको बताए।
'अस्पताल १४ वटा छन् तर ज्वरो नाप्ने थर्मल गन १० वटा आएको छ। सबै जिल्लाका अस्पताललाई दिन पाए राम्रो हुन्थ्यो,' उनले भने।
मन्त्री सुवेदीले प्राप्त एक हजार पिपिई सबै जिल्ला अस्पताललाई वितरण गरिने जनाए।
