डेमोक्र्याटिक पार्टीका तर्फबाट अमेरिकी राष्ट्रपति उम्मेदवारका प्रमुख दाबेदार जो बाइडनको लोकप्रियता पछिल्लो समय राष्ट्रपति डोनाल्ड ट्रम्पको भन्दा बढेको देखिएको छ।
बेलायती समाचार संस्था रोयटर्स तथा आइपिएसओएसले मंगलबार सार्वजनिक गरेको अनलाइन मत सर्वेक्षणमा बाइडनको लोकप्रियता बढेको देखिएको हो।
सूचीकृत मतदाताहरूमाझ गरिएको सर्वेक्षणमा ४६ प्रतिशत सहभागीले आगामी नोभेम्बर ३ मा हुने राष्ट्रपति चुनावमा बाइडन सहभागी भए उनलाई भोट हाल्ने बताए भने ४० प्रतिशतले ट्रम्पलाई मतदान गर्ने बताए।
यो सर्वेक्षणमा बाइडन ट्रम्पभन्दा ६ प्रतिशतले अगाडि देखिएका छन् जबकी यसअघि मार्च ६ देखि ९ सम्म गरिएको यस्तै सर्वेक्षणमा उनीमात्र एक प्रतिशतले अगाडि थिए।
यो नतिजालाई आधार मान्दा पछिल्लो समय अमेरिकामा फैलिएको कोरोना भाइरसको संक्रमणले बाइडनको राजनीतिक व्यक्तित्वमा कुनै क्षति पुगेको छैन। तर कोरोनाविरूद्धको लडाइँमा नेतृत्व गरिरहेका ट्रम्पले भने संक्रमण झन् फैलिँदै गए यसको मूल्य चुकाउनु पर्ने देखिएको छ।
कोरोना भाइरसका कारण करोडौं अमेरिकीहरू घरभित्र खुम्चिन बाध्य भएको अवस्थामा बाइडन पछिल्लो समय सार्वजनिक सभा-सम्मेलनमा सहभागी भएका छैनन्। राष्ट्रपति ट्रम्प भने दैनिकजसो कोरोना भाइरससम्बन्धी टेलिभिजन ब्रिफिङमा देखिने गरेका छन्।
भाइरसको महामारीले गर्दा बाइडनले चन्दा उठाउनेदेखि अन्य चुनावी गतिविधि स्थगित गर्नु परेको छ। यस्तै थुप्रै राज्यमा डेमोक्रयाटिक पार्टीको प्राइमरी पनि रोकिएको छ। डेमोक्रयाटिक पार्टीबाट बाइडनसँगै बर्नी स्यान्डर्स पनि राष्ट्रपतिको उम्मेदवार बन्ने दौडमा छन्।
कोरोना भाइरस रोकथामका लागि ट्रम्पले लिएको नीतिले पनि मानिसहरूको उनीप्रतिको दृष्टिकोणमा झिनो परिवर्तन आएको छ।
४४ प्रतिशतले ट्रम्पको समग्र कार्यशैली ठीक भएको बताएका छन् भने ४८ प्रतिशतले कोरोना भाइरस रोकथामका लागि ट्रम्पको काम गर्ने तरिका मन नपराएको प्रतिक्रिया छन्।
सर्वेक्षणमा सहभागी ८९ प्रतिशतले आफूहरू कोरोना भाइरसको महामारीप्रति कुनै न कुनै प्रकारले चिन्तित रहेको बताएका छन्।
सर्वेक्षणमा कुल ११ सय १४ जना सहभागी थिए।