नेपाली कांग्रेसका केन्द्रीय सदस्य प्रदीप पौडेलले सरकारले नै भ्रष्टाचारको नेतृत्व गरेको आरोप लगाएका छन्।
कोरोनासँग लडिरहेको संकटग्रस्त अवस्थामा रहेका बेला स्वास्थ्य उपकरण खरिद सम्झौतामा करोडौं भ्रष्टाचार गर्ने अमानवीय कार्य सरकारकै नेतृत्वमा भएको उनले बताएका हुन्।
‘स्वास्थ्य उपकरण खरिद सम्झौतामा करोडौं भ्रष्टाचार गर्ने अमानवीय, निकृष्ट र आपराधिक कार्यको नेतृत्व स्वयम सरकारले नै गरिरहेको छ,’ बिहीबार पौडेलले फेसबुकमा लेखेका छन्, ‘सबैतिरबाट विरोध भएपछि र पोल खुलेपछि लाजगालका कारण निर्णय फिर्ता गरेको छ।’
उनले संकटका बेला सत्ताबाट पीडादायी गतिविधि भइरहेको बताएका हुन्।
‘संकटको यो घडीमा सत्ताबाट गरिएका यी हर्कत असहयै र पीडादायी छन्,’ उनले भनेका छन्, ‘यस्तो बिपतमा पनि ब्रमहलुट गर्नेहरूबाट जनताको स्वास्थ्य सुरक्षा हुन्छ भनेर कसरी मान्न सकिन्छ? यस्तो अबस्थामा कडा प्रतिवाद जरुरी छ।’
सरकारले चीनबाट हालै स्वास्थ्य सामग्री खरिद गर्दा अनियमितता भएको खबरहरू आइरहेका छन्।