भारतीय प्रधानमन्त्री नरेन्द्र मोदीले आफ्ना नागरिकलाई आइतबार राति बिजुली बत्ती निभाएर दीयो बाल्न आग्रह गरेका छन्।
शुक्रबार भिडिओ कन्फरेन्समार्फत देशवासीका नाममा सम्बोधन गर्दै मोदीले आउने आइतबार राति नौ बजे दीयो, मैनबत्ती अथवा मोबाइलको टर्च बाल्न आग्रह गरेका हुन्।
उनले कोरोना भाइरससँग लड्न र एकता झल्काउन नौ मिनेटसम्म घरको बत्ती निभाएर दियो, मोबाइलको टर्च वा मैनबत्ती बाल्न आग्रह गरेका हुन्।
‘कोरोना भाइरस संकटले फैलाएको अन्धकारलाई प्रकाशको शक्तिमार्फत् हामीले एक भएर चुनौती दिनुपर्छ। यो दिन हामीले एक सय ३० करोड भारतीय महाशक्तिलाई जगाउनुपर्छ। हामीले यी १ सय ३० करोड भारतीयको प्रतिवद्धतालाई अझ नयाँ उचाइमा पुर्याउनुपर्छ,’ मोदीले भने,‘अप्रिल ५ आइतबार राति नौ बजे म सबैसँग नौ मिनेटको समय चाहन्छु। घरको सबै बत्ती निभाउनुस्। ढोका, झ्याल अथवा बरन्डामा उभिनुस् र मैनबत्ती, दीयो र मोबाइलको टर्च नौ मिनेटसम्म बाल्नुस्।'
मोदीले कोही पनि बाहिर आएर भीडभाड नगर्नसमेत आग्रह गरेका छन्।
'कृपया कोही पनि आफ्नो इलाकाको सडकमा नआउनू। जे गर्नु छ सबैले घरभित्रै गर्नुस,' उनले थपे,'कसैले पनि सामाजिक दूरीको लक्ष्मण रेखा पार नगरोस्। कोरोना भाइरसको जञ्जाललाई तोड्ने एकमात्र उपाय सामाजिक दूरी हो।'
यसअघि मार्च २२ तारिखमा प्रधानमन्त्री मोदीले जनता कर्फ्यु जारी गर्ने निर्णय गरेका थिए।
भारतमा अहिलेसम्म २५ सयभन्दा बढीमा कोरोना भाइरसको संक्रमण पुष्टी भइसकेको छ भने ७० जनाको मृत्यु भएको इन्डिया टुडेले जनाएको छ।
