नेपाली कांग्रेसका सहमहामन्त्री प्रकाशशरण महतले मध्यावधि चुनाव हुनु पर्ने माग आफूले नगरेको दाबी गरेका छन्।
प्राइम टिभीमा पत्रकार ऋषि धमलासँगको अन्तर्वार्तामा महतले मध्यावधि चुनाव गर्न माग गरेको उल्लेख गर्दै रिपोर्टस नेपाल डटकमले समाचार लेखेको थियो। उक्त समाचारको शीर्षक छ- सरकार असफल भयो, अब मध्यावधि चुनाव हुनुपर्छ: डा महत।
आफूले बोल्दै नबोलेको कुरालाई राखेर समाचार लेखिएको भन्दै महतले आइतबार विज्ञप्ति निकालेका छन्।
‘अन्तर्वार्ताका क्रममा मैले कोरोनासंक्रमण सकिएपछि कस्ता-कस्ता अवस्था आउन सक्छन् भन्ने विषयका बारे गरेको विश्लेषणलाई बंग्याएर हेडलाइनमै मध्यावधि निर्वाचन चाहियो भनेर प्रचार हुँदा दुःख लागेको छ,’ उनले विज्ञप्तिमा भनेका छन्, ‘हालै एउटा टेलिभिजनलाई अन्तर्वार्ता दिने क्रममा मैले बोलेका कुराको प्रसंगलाई तोडमोड गरेर एउटा अनलाइनमा मैले मध्यावधि निर्वाचनको माग गरेको भनी हेडलाइन राखेकै आधारमा र पूरै अन्तर्वार्ता नसुनी मध्यावधि निर्वाचनको माग गर्यो भनेर प्रचार गरिएकोमा मेरो गम्भीर ध्यानाकषर्ण भएको छ।’
उनले लकडाउनका बेला सबैले एकअर्कालाई सघाउने समय भएको भन्दै अफवाहका पछाडि नलाग्न र सत्य तथ्यका आधारमा मात्रै धारणा बनाइदिन विज्ञप्तिमार्फत् अनुरोध गरेका छन्।
महतले सेतोपाटीसँग कुराकानी गर्दै आफूले अन्तर्वार्तामा नबोलेका कुरा हेडलाइनमा राखिएको दाबी गरे।
‘मैले नबोलेका कुरा समाचारको हेडलाइमा आयो, मानिसहरूले समाचार पढेनन्, हेडलाइन पढे र आफूखुसी धारणा बनाउँदै नकरात्मक टिप्पणी गरिरहेका छन्। मलाई गाली गरिरहेका छन्,’ उनले भने।
मध्यावधि चुनावबारे अन्तर्वार्ताका क्रममा केही कुरा भएन? भन्ने सेतोपाटीको प्रश्नमा महतले भने, ‘अहिले मध्यावधि चुनाव हुनुपर्छ भनेर भनेको छैन। यस्तो बेला कसले मध्यावधि चुनाव हुनुपर्छ भन्छ?’ तर धमलासँगको अन्तर्वार्तामा महतले असक्षम सरकारले राजीनामा दिनुपर्ने, संक्रमण सकिएपछि, पार पाइसकेपछि अब देश त मध्यावधि चुनावमा जानुपर्ने अवस्था’ भनेका छन्।
उनले सरकारले स्वास्थ्य साम्रगी खरिद गर्न नसकेको र जनअपेक्षाअनुसार काम गर्न नसकेर असफल भएको भन्ने आफूले अन्तर्वार्तामा बताएको उल्लेख गरे।
‘मैले यतिमात्र भनेको हुँ, सरकारले विश्वास गुमायो। काम गर्न सकेन। असफल भयो। ओलीजी बिरामी हुनुहुन्छ,’ महतले भने, ‘सरकारले काम गर्न सकेन, असफल भयो भन्ने कुरा नै मुख्य थिम थियो। तर गर्ने के त्यस्तो हेडलाइनमा समाचार आएछ।’
महतले निकालेको विज्ञप्ति:
