पाँचखाल नगरपालिकाले कोरोना भाइरस संक्रमण रोकथामका लागि सोमबारबाट लागू हुने गरी एउटा वडाबाट अर्को वडामा जान रोक लगाएको छ।
संघीय सरकारले निर्णय गरेको भोलिपल्ट आइतबार पाँचखाल नगरपालिकाको ६२ औं बैठकले एक वडाबाट अर्कोमा जान रोक लगाएको नगर प्रमुख महेश खरेलले जानकारी दिए।
तरकारी, दूध, औषधि र खेतबारीमा काम गर्ने कृषकबाहेक अरूलाई सोमबारदेखि एक वडाबाट अर्कोमा जान नदिने उनले बताए।
लकडाउन भए पनि स्थानीयहरू नियममा नबसेको भन्दै बैठकले मदिराजन्य पसल सबै बन्द गराउने, वडाभित्रका खाद्यान्न पसल साताको दुई दिन सोमबार र शुक्रबार मात्र खोल्ने, नगरभित्रका होलसेल पसल साताको एक दिन सोमबार मात्र खोल्न पाउने निर्णय गरेको खरेलले जानकारी दिए।
बैठकले कोरोना भाइरस नियन्त्रण, रोकथाम तथा सरसफाइमा नगरपालिकाबाट खटिएका जनप्रतिनिधि, स्थायी, अस्थायी तथा करारका कर्मचारीको संक्रमणले मृत्यु भए उनको परिवारलाई २५ लाख रूपैयाँ दिने निर्णय पनि गरेको छ।