प्रमुख प्रतिपक्षी नेपाली कांग्रेसले सरकारको वेवास्ताले गर्दा सीमा क्षेत्रमा सयौं नेपाली विचल्लीमा परेको बताएको छ।
विचल्लीमा रहेका नेपालीलाई सुरक्षित र व्यवस्थित रूपमा राख्न तथा नेपाल प्रवेश गर्न दिएर क्वारेन्टाइनमा राख्नुपर्ने कांग्रेसको भनाइ छ।
दार्चुला सदरमुकामपारि धार्चुलामा भारतीय भूमिमा सयौं नेपाली सातादेखि रोकिएका छन्। सीमा नाका बन्द, महाकालीको झोलुंगे पुल बन्द हुँदा उनीहरू भारतीय भूमिमै रोकिएका छन्। केही भने महाकालीमा हेलिएर नेपाल आएका छन्।
पार्टी सभापति शेरबहादुर देउवाको निवास बुढानिलकण्ठमा मंगलबार बसेको कांग्रेस पदाधिकारी बैठकले अनिवार्य क्वारेन्टाइनमा बस्ने व्यवस्था मिलाएर सीमामा अलपत्र नेपालीलाई स्वदेश भित्र्याउनुपर्नेमा सरकारको ध्यानाकर्षण गराएको हो।
बैठकमा सरकारका गतिविधिबारे पनि समीक्षा भएको छ। कोरोनाभाइरस संक्रमित संख्या वृद्धि भइरहे पनि सरकारले आवश्यक पर्ने स्वास्थ्य सामग्रीसमेत खरिद गर्न नसकेको भन्दै कांग्रेसले सरकारको आलोचना गरेको छ।
नेपाली सेनालाई स्वास्थ्य सामग्री खरिद गर्न दिएर गलत नजिर स्थापना गर्न सरकारले भूमिका खेलेको कांग्रेसको आरोप छ। यस्तै पिपिईलगायत स्वास्थ्य सामग्री उपलब्ध गराउन सरकारले ढिलाइ गरेको पनि कांग्रेसको भनाइ छ।
कांग्रेस प्रवक्ता विश्वप्रकाश शर्माले सरकारका कमीकमजोरी औंल्याउँदै संकटका बेला सरकारलाई सहयोग गरेर जाने विषयमा पदाधिकारी बैठकमा छलफल भएको बताए। सरकारले संसद बैठक प्रतिपक्षीसँग छलफलविना नै स्थगित गरेकोमा पनि असंतुष्टि जनाएको छ।
