प्रमुख प्रतिपक्षी नेपाली कांग्रेसका सभापति शेरबहादुर देउवाले अब कति दिन लकडाउन गर्नुपर्ने हो त्यसको अध्ययन हुनुपर्ने बताएका छन्।
सरकारले वैशाख ३ गतेसम्म लकडाउन गरेको छ भने वैशाख १८ गतेसम्म उडान बन्द गरेको छ।
सभापति देउवाले बुधबार न्युज एजेन्सी नेपालसँग कुराकानी गर्दै सरकारले अब कति दिन लकडाउन गर्नुपर्ने अवस्था रहन्छ भन्ने अध्ययन गर्नुपर्ने बताएका हुन्।
देउवाले दार्चुलापारि धार्चुलास्थित भारतीय भूमिमा रहेका नेपालीलाई नाका खुला गरी अनिवार्य क्वारेन्टाइनमा राख्न पनि सरकारसँग माग गरेका छन्।
स्वास्थ्य सामग्री खरिदमा पारदर्शीता हुनुपर्ने देउवाको भनाइ छ।
‘सरकारलाई पारदर्शी रुपमा स्वास्थ्य सामग्रीको खरिद गर्न र कति दिन लकडाउन गर्नुपर्ने हो त्यसको अध्ययन गरेर अगाडि बढनसमेत सरकारलाई अनुरोध छ,’ देउवाले भने।
सभापति देउवाले लकडाउनको पालना गर्न र सामाजिक दूरी कायम गर्न अपिल पनि गरेका छन्।
सरकारले आशंका लागेका सबै नागरिकको परीक्षण गर्ने व्यवस्था मिलाउन पनि जोड दिएका छन्।
स्वास्थ्यकर्मी, सुरक्षाकर्मी र सञ्चारकर्मीलाई उच्च सतर्कता अपनाएर काम गर्न सभापति देउवाले आग्रह गरेका छन्।
हेर्नुस् भिडिओ: