यमनमा हुथी विद्रोहीसँग लडिरहेको साउदी नेतृत्वको गठबन्धनले युद्धविरामको घोषणा गरेको अधिकारीहरुले बताएका छन्।
बिबिसीका अनुसार पाँच वर्ष लामो युद्ध अन्त्य गर्ने संयुक्त राष्ट्रसङ्घको प्रयासको समर्थनमा युद्धविराम हुन लागेको हो। युद्धविराम बिहीबारबाट लागु हुने जनाइएको छ।
पश्चिमी सैनिक शक्तिहरुको समर्थनमा रहेको यो गठबन्धन मार्च २०१५ देखि इरानका हुथी सेना विरुद्ध लडिरहेको थियो। अझै पनि हुथी सेनाले भने युद्धविरामको पालना गर्छ वा गर्दैन भन्ने स्पष्ट नभएको बिबिसीले लेखेका छन्।
गत महिना संयुक्त राष्ट्र संघका सचिव एन्टोनियो गुटेरसले यमनको युद्धमा लागेकाहरुलाई युद्ध रोक्न र कोरोना भाइरसको सम्भावित प्रकोप रोक्न जोड दिएका थिए।
युद्धविरामबारे छलफल गर्न दुवै पक्षले भिडियो कन्फ्रेन्समा भाग लिने आशा गरिएको छ।
हुथी आन्दोलनका प्रवक्ता मोहम्मद अब्दुसलमका अनुसार उनीहरुको समूहले युद्ध अन्त्य गर्ने तर यसका लागि यमनमा नाकाबन्दी गर्नुपर्ने प्रस्ताव राखेका छन्।
