सत्तारूढ नेपाल कम्युनिस्ट पार्टी (नेकपा) नेता सुरेन्द्र पाण्डेले अनलाइनबाट विद्यार्थीलाई पढाउने भएका छन्।
उनले भरतपुरको बोस्टन इन्टरनेशनल कलेजका विद्यार्थीलाई 'गेस्ट लेक्चरर'का रूपमा सम्बोधन गर्न लागेको कलेज प्रशासनले जानकारी दिएको छ।
लकडाउन कारण कलेजले विद्यार्थीलाई अनलाइनमार्फत् पढाउँदै आइरहेको छ। चैत २९ गते दिउँसो २ देखि ३ बजेसम्म पाण्डेले व्यवस्थापन संकायतर्फका स्नातकोत्तर (एमबिए) का विद्यार्थीलाई सम्बोधन गर्ने कलेजका कार्यकारी निर्देशक राजु तामाङले बताए।
लकडाउनकै बीचमा पनि प्रविधिमार्फत् जोडिएर विद्यार्थीको अध्यापनलाई नियमित बनाएको उनको भनाइ छ।
कोरोना भाइरस (कोभिड १९) ले ल्याउने आर्थिक संकट तथा नेपालमा वित्तीय र बजेट नीति कार्यान्वयनका जटिलताका सम्बन्धमा नेता पाण्डेले विद्यार्थीलाई प्रशिक्षित गर्ने उनले बताए। पाण्डेको कक्षामा रूचि भएका अरू विद्यार्थी पनि सहभागी हुन सक्ने व्यवस्था मिलाएको तामाङले जानकारी दिए।
पाण्डे नेकपाका स्थायी कमिटी सदस्य हुन्। चितवनको क्षेत्र नम्बर १ बाट प्रतिनिधिसभामा निर्वाचित पाण्डे अर्थ राजनीति र विकास नीतिका बारेमा नियमित लेख्दै आएका छन्।
कक्षामा भाग लिन यहाँ दिइएको आइडी र पासवर्ड प्रयोग गर्न सकिन्छ।