१२ वर्अघिको रौतहट बम विष्फोट तथा सामुहिक हत्याकाण्डमा पुर्पक्षका लागि जेल चलान भएका नेपाली कांग्रेसका निलम्बित सांसद मोहम्मद अफताब आलमको घरमा प्रहरीले छापा मारेको छ।
हत्याकाण्डमा संलग्न उनका भाइ महताब आलमलाई खोजिरहेको प्रहरीले बिहीबार मध्यरातमा रौतहटस्थित उनको घरमा छापा मारेको हो।
जिल्ला प्रहरी कार्यालयका डिएसपी भरत श्रेष्ठका अनुसार महताब आलम घर आएको सूचना पाएपछि प्रहरी टोली छापा मार्न गएको थियो। छापा मार्ने क्रममा स्थानीयले अवरोध गरेपछि प्रहरीले १२ राउण्ड हवाइ फायर गरेको उनले बताए।
‘उनका भाइ घर आएको भन्ने सूचनाका आधारमा हामीले छापा मारेका हौं,' डिएसपी श्रेष्ठले भने,'स्थानीयले हामीमाथि ढुङ्गामुढा गरेपछि हामीले हवाइ फायर गरेका हौं।'
प्रहरीले उनका भाइलाई भने फेला पार्न सकेन।
बम बिस्फोटमा परेर घाइते भएकाहरूलाई प्रमाणसमेत नष्ट हुने गरी जिउँदै इँटाभट्टामा हालेर जलाएको अभियोग लगाएर सरकारी वकिल कार्यालयले आफताब आलमविरूद्ध जिल्ला अदालत रौतहटमा मुद्दा दायर गरेको थियो।
निर्मम तरिकाले हत्या गरेको अभियोग लागेकामा आलमसहित उनका भाइ महताब अफताब आलम, मोहम्मद मोबिन आलम, शेख भदई, शेख सेराज भन्ने शेष सराज, शेख फजलेहक, सगिर आलम, शेख जुमईन भन्ने शेख मलकार, गौरीशंकर साह, बद्री सहनी र मुक्ति साह छन्।
आलम पक्राउ परे पनि अरू सबै फरार छन्।
