प्रदेश दुईका मुख्यमन्त्री लालबाबु राउतले आफ्नो प्रदेशमा कोरोना संक्रमण बढ्दै गएकाले व्यवस्थापन गर्न चुनौति भएको भन्दै प्रधानमन्त्रीलाई चिठी लेखेका छन्।
बुधवार प्रधानमन्त्री केपी शर्मा ओलीलाई पत्र लेख्दै मुख्यमन्त्री राउतले दक्ष जनशक्ति, भिटिएम र परीक्षण किटहरू बढाइदिन माग गरेका छन्।
'प्रदेश सरकारले सिमापारीबाट आफ्ना नागरिक ल्याउन सुरू गरेपनि त्यसको व्यवस्थापन निकै चुनौतिपूर्ण बन्दै गएको छ,' उनले लेखेका छन्, 'छिटो भन्दा छिटो परीक्षणको संख्या बढाएर क्वारेन्टिनमा रहेका नागरिकको व्यवस्थापन गर्नुपर्ने भएकाले संघीय सरकारसँग दक्ष जनशक्ति, भिटिएम लगायतका उपकरण तथा स्वास्थ्य सामाग्री तत्काल उपलब्ध गराइदिन अनुरोध छ।'
आफ्नो प्रदेशमा वैदेशिक रोजगारमा भारत लगायत तेस्रो मुलुकबाट फर्किनेको संख्या १० लाख पुग्न सक्ने बताउँदै विशेष आर्थिक प्याकेज उपलब्ध गराउन पनि संघीय सरकारसँग माग गरेका छन्।
कोरोना विरुद्धको लडाईंका लागि विशेष उपलब्ध गराउन माग गरेका हुन्।
'यस प्रदेशका करिब १० लाख जनशक्ति वैदेशिक रोजगारबाट फर्कन सक्ने संभावना रहेको छ,' चिठिमा मुख्यमन्त्री राउतले लेखेका छन्,'प्रदेशका जनताको जिविकोपार्जन माध्यम कृषि र कृषि भूमिको उपलब्धतालाई समेत विचार गरी प्रदेश यूवा रोजगार कार्यक्रम र कृषिमा विशेष उत्पादन अभियानका साथै राहत विशेष कार्यक्रम सञ्चालन गर्नुपर्ने भएकाले प्रदेश २ का लागि विशेष आर्थिक प्याकेज उपलब्ध गराइदिनु हुन अनुरोध छ।'
मुख्यमन्त्री राउतले लक डाउनका कारण दैनिक जिवन यापनमा समस्या भोगी रहेका नागरिकहरुलाई प्रदेश सरकारले स्थानीय तहको समन्वयमा दुई चरणको राहत वितरण गरेपनि लकडाउन थपिदै जाँदा प्रदेशको भौगोलिक अवस्था, जनसाङ्खिक बनौट, मानव विकास सुचकाङ्क र सामाजिक विकासको अवस्था समेतका आधारमा प्रदेश सरकारले मात्र खाद्यान्न सहितको राहत उपलब्ध गराउनु चुनौतीपूर्ण रहेकोले संघीय सरकारबाट ठोस कार्यक्रम आउनुपर्ने पत्रमा उल्लेख गरेका छन्।
