नेपाली कांग्रेसका सांसद गगन थापाले कोरोनाभाइरसबाट उत्पन्न हुने दीर्घकालीन असरको सोंच बजेटले नलिएको बताएका छन्।
अर्थमन्त्री डा. युवराज खतिवडाले प्रस्तुत गरेको १४ खर्ब ७४ अर्बको बजेट वक्तव्यपछि सञ्चारकर्मीसँग कुराकानी गर्दै थापाले सरकार दुई महिनामै नेपालमा कोरोना निर्मुल हुनेमा आत्मविश्वासी देखिएको बताए।
उनले भने ‘यो सरकारले जसरी खर्च जुटाउने र खर्च गर्ने संकल्प बजेटमा राखेको छ, यो हेर्दा अबको दुई/तीन महिनामै कोरोना भाइरसबाट नेपाल पूर्ण रुपमा मुक्त रहन्छ, हामी प्रभावित रहँदैनौँ भन्नेजस्तो आत्मविश्वास पाएँ।’
केही ठाउँहरुमा पुनरुत्थानका केही प्याकेज आएता पनि मन्त्रालयगत विवरण र खर्च जुटाउने तरिका हेर्ने हो भने यो सिंगो वर्ष कोरोनाको असर पर्ने उनले बताए।
तर बजेट भने सिंगो वर्ष प्रभावित नहुनेजस्तो सोंच राखेर बनाइएको उनको आरोप छ। ‘यो क्राइसिस बेलालाई उहाँहरुले ग्रहण गर्नुभएन जस्तो मेरो प्रारम्भिक विश्लेषण छ’ थापाले भने।