भारतको राज्य सभाका सासंद तथा भारतीय जनता पार्टीका राष्ट्रिय कार्यपालिका सदस्य सुब्रमनियन स्वामीले विदेश मन्त्रालयका कूटनीतिज्ञहरूले नेपाली समकक्षीसँग मिठो भाषा प्रयोग गर्नु पर्ने बताएका छन्।
सीमा विवादले नेपाल-भारतको सम्बन्ध बिग्रिएको अवस्थामा शुक्रबार ट्वीट गर्दै स्वामीले प्रधानमन्त्री नरेन्द्र मोदीले विदेश मन्त्रालयका कूटनीतिज्ञहरूलाई नेपाली समकक्षीहरूसँग मिठो भाषा प्रयोग गर्न लगाउनु पर्ने उल्लेख गरेका छन्।
'प्रधानमन्त्रीले आफ्नो विदेश मन्त्रालयका कूटनीतिज्ञहरूलाई नेपाली समकक्षीहरूसँग मिठो भाषा प्रयोग गर्न भन्नुपर्छ,' उनले लेखेका छन्,‘ नेपाल हाम्रो रगतको नाता भएको भाइ हो र ऊ कलिलो छ। यदि नेपालीहरूले आफूलाई छुट्याइएको महशुस गर्छन् भने हामीले छाती फराकिलो पारेर त्यसलाई बुझ्नुपर्छ र उनीहरूको त्यो भावनालाई शान्त बनाउनु पर्छ।’
लिम्पियाधुरा क्षेत्रमा भारतले एक पक्षीय रूपमा नेपाली भूमिमा सडक बनाएको भन्दै नेपालमा पछिल्लो समय चर्को विरोध भएको छ।
सरकारले लिम्पियाधुरा र कालापानी क्षेत्र समेटेर नेपालको नयाँ नक्सासमेत जारी गरेको छ। उक्त नक्सा प्रचलनमा ल्याउन संविधानको निशान छाप परिवर्तन गर्न संविधान संशोधनको प्रक्रिया सुरू भइसकेको छ।
नेपालले भारतले सेना राखेको कालापानी क्षेत्र छोड्नु पर्ने र त्यसका लागि कूटनीतिक रूपमा समस्याको समाधान गर्न तयार रहेको बताउँदै आएको छ।
भारतले भने कोरोनाभाइरसको महामारी सकिएपछि मात्र वार्ता हुने बताउँदै आएको छ।
यही बेला पूर्वमन्त्री समेत रहेका स्वामीले शुक्रबार यस्तो ट्वीट गरेका हुन्।
यसअघि बिहीबार भारतीय विदेश मन्त्रालयका प्रवक्ता अनुराग श्रीवास्तवले पनि नेपालसँगको सीमा विवादबारे वार्ता गर्न भारत खुला रहेको बताएका थिए।