नेकपा महासचिव विष्णु पौडेलले सरकारले ल्याएको बजेटले कोरोनाको सामना गर्ने र नीति तथा कार्यक्रमलाई कार्यान्वयन गर्ने अठोट गरेको दावी गरेका छन्।
आगामी आर्थिक वर्षको बजेट राजश्व र व्ययको अनुमान माथिको छलफलमा महासचिव पौडेलले कोभिड १९ लाई सामना गर्ने, आर्थिक पुनरुत्थान गर्ने, निर्वाचनका बेलामा जनतामाझ गरिएको प्रतिबद्धता पुरा गर्ने र नीति तथा कार्यक्रमलाई कार्यान्वयन गर्नेगरी आएको बताए।
महासचिव पौडेलले स्रोत व्यवस्थापन र विनियोजन कुशलताको दृष्टिकोणले पनि बजेट यथार्थपरक रहेको बताए। बजेटले अधिकतम प्रतिफल दिन्छ भन्नेमा आफू विश्वस्त रहेको उनको भनाइ छ।
गत वर्षको तुलनामा ४ प्रतिशतले बजेटको आकार सानो रहेपनि आजको यथार्थलाई स्वीकारेको पौडेलको दावी छ।
‘बजेटले आजको चुनौति र भोलिको संभावनालाई आत्मसाथ गरेको छ। नागरिकको जीवन रक्षालाई महत्व दिएको छ’ पौडेलले भने, ‘विकासमा निरन्तरता, लोक कल्याणकारी राज्य, स्वाधीन र स्वतन्त्र अर्थतन्त्र यसका मुख्य विशेषता हुन्।’
बजेट धरातलीय यथार्थ अनुसार आएको भन्दै महासचिव पौडेलले आन्तरिक राजश्वलाई बजेटले आधार मानेको बताए।
बजेट कार्यान्वयनका लागि प्रतिकुलता र चुनौति रहेको भन्दै उनले यसको सामना गरेर मात्रै अगाडि बढ्न सकिने बताए। ७ प्रतिशतको आर्थिक वृद्धिदर हासिल गर्ने योजना सह्राहनीय रहेको भन्दै पौडेलले स्वास्थ्य, शिक्षा, कृषि र आर्थिक पुनरुत्थानलाई प्राथमिकतामा राखेको दावी गरे।
महासचिव पौडेलले कोरोनालाई परास्त गर्ने र आर्थिक उन्नतिलाई पनि अगाडि बढाउने सरकारको नीति उत्तम रहेको बताए।
‘कोभिड १९ को चुनौति नेपाल एक्लैले सामना गर्न सक्दैन। कोरोना भाइरसको कारण मान्छे मर्न तयार होला तर भोकै मर्न कोही तयार हुँदैन।’ उनले भने, ‘कोरोनामा मात्रै केन्द्रित हुँदा कोरोना सकिएको भोलिपल्ट हामी केही गर्न सक्दैनौँ। त्यही भएर कोरोना रोकथाममा केन्द्रित हुँदै उत्पादनमा पनि ध्यान दिनुपर्छ। यो बजेटले त्यही काम गरेको छ।’
कोरोनासँगै यात्रा गर्दै परास्त गर्ने र सामाजिक,आर्थिक क्रियाकलापलाई अगाडि बढाउन आवश्यक रहेकोमा उनको जोड थियो।
‘स्वास्थ्य क्षेत्रको समग्र समस्या समाधान गर्ने उद्देश्यले बजेट आएको छ। ४० प्रतिशत नेपालीलाई बीमा गराउने र तीन वर्षभित्र सबैलाई बीमा गराउने योजना राम्रो छ’ उनले भने, ‘राहत र पुनरुउत्थानमा सरकारले मौलिक तरिका अपनाएको छ। यो बजेटको महत्वपुर्ण पक्ष रोजगारी हो। १२ लाख जनसंख्यालाई यो आगामी वर्षमा प्रत्यक्ष अप्रत्यक्ष ढंगले समेट्ने योजना जनताको पक्षमा छ।’
रोजगारीमा आवद्ध गर्ने अठोट गर्ने सरकारको नीति महत्वपुर्ण रहेको भन्दै उनले कृषि र पशुपंक्षीको क्षेत्रमा पनि महत्वपुर्ण योजना ल्याइएको बताए।
