अमेरिकी राष्ट्रपति निवास ह्वाइट हाउसअगाडि भएको प्रदशर्नले उग्र रूप लिएपछि राष्ट्रपति डोनाल्ड ट्रम्पलाई बंकरमा लगेर राखिएको खुलेको छ।
शुक्रबार राति ह्वाइटहाउस अगाडि भएको प्रदर्शनमा प्रदर्शनकारीले ढुङ्गामुढा गर्न थालेपछि उनलाई सेक्रेट एजेन्टहरूले सुरक्षाका लागि बंकरमा लगेको खुलेको हो। आतंकवादी समूहको हमला वा आपतकालिन सेवाको लागि बनाइएको बंकरमा ट्रम्पलाई एक घन्टा राखिएको समाचार संस्था एसोसियट प्रेसले जनाएको छ।
यद्यपी उनले उक्त बंकर शनिबार र आइतबार प्रयोग गरे/नगरेको भने खुलेको छैन।
ह्वाइट हाउसले पनि ट्रम्प बंकरमा गएकोबारे पुष्टि भने गरेको छैन।
‘ह्वाइट हाउसले सेक्युरिटी प्रोटोकलको र त्यसका निर्णयबारे टिप्पणी गर्दैन,’ ह्वाइट हाउसका प्रवक्ता जुड डिरीले भने।
राष्ट्रपति ट्रम्प बंकरमा गएकोबारे भने पहिलो पटक न्युयोर्क टाइम्सले लेखेको थियो। तर फर्स्ट लेडी मेलेनिया ट्रम्प र उनका १४ वर्षीय छोरालाई बंकरमा लगिएकोबारे भने खुलाइको छैन।
गत सोमबार मिनिसोटा राज्यको मिनियापोलिसमा काला जातिका जर्ज फ्लोयडको ज्यान गएको थियो। प्रहरी अधिकारीले उनलाई नियन्त्रणमा लिँदा भुइँमा सुताएर घाँटीमा घुँडाले थिच्दा सास फेर्न नसकेर ज्यान गएको थियो।
उक्त घटनाको भिडिओ सार्वजनिक भएपछि अमेरिकामा मानिसहरू घटनाको विरोधमा सडकमा निस्किएका हुन्। ती प्रहरी अधिकारीलाई नियन्त्रणमा लिइसकेको छ भने थर्ड डिग्री हत्याको मुद्दा दर्ता गरिएको छ। तर प्रदर्शनकारीहरूले अन्य तीन जना प्रहरीहरूलाई पनि नियन्त्रणमा लिन पर्ने माग राखेका हुन्।
