छुट्टै संविधान संशोधन विधेयक दर्ता गराउन राजपा र समाजवादीका नेता फेरि पुगे संसद सचिवालयमा

सेतोपाटी संवाददाता

काठमाडौं,जेठ १९

समाजवादी पार्टी नेपाल र राष्ट्रिय जनता पार्टी गैर-सरकारी विधेयकका रूपमा संविधान संशोधन विधेयक दर्ता गराउन फेरि संसद सचिवालय पुगेका छन्।

विधेयक शाखाका प्रमुख नारायण ढकालले संशोधन प्रस्ताव प्राप्त भएको र अध्ययनको क्रममा रहेको बताए।

'उहाँहरूले प्रस्ताव ल्याउनु भएको छ। हामी अध्ययन गर्दैछौं', ढकालले सेतोपाटीसँग भने, 'दर्ता भएको छैन।'

समाजवादी र राजपाले एकीकरण गरेर जनता समाजवादी पार्टी निर्माण गर्ने समझदारी गरे पनि दुई दलबीचको एकीकरण प्रक्रिया अगाडि बढ्न सकेको छैन।

सरकारले नयाँ नक्सा अनुरूप निशान छाप परिवर्तन गर्न संविधान संशोधन विधेयक अगाडि बढाएलगत्तै समाजवादी र राजपाले पुरानो संविधान संशोधनको माग ब्यूँताएका हुन्।

उनीहरूले नागरिकता, भाषा, जनसंख्याका आधारमा राष्ट्रिय सभामा प्रतिनिधित्व र प्रदेशको सीमांकन परिवर्तन गर्न आयोग गठनको माग समेटेर संशोधन दर्ता गर्न लागेका हुन्।

गैर-सरकारी संशोधन विधेयक दर्ता भए पनि विधेयक संघीय संसदमा अगाडि बढाउने/नबढाउने अधिकार सभामुखसँग हुन्छ।

संविधान संशोधनका लागि दुई तिहाइ मत आवश्यक हुन्छ। तर सत्तारूढ नेकपाको मतबिना संशोधन सम्भव छैन।

प्रकाशित मिति: सोमबार, जेठ १९, २०७७ ०५:४२

सिफारिस

ऊर्जा सुरक्षामा कस्तो छ नेपालको अवस्था?