गृह मन्त्रालयले कोरोना भाइरसको उपचारमा खटिएका स्वास्थ्यकर्मीमाथि दुर्व्यवहार गर्नेलाई कारबाही गर्न सबै जिल्ला प्रशासन कार्यालयहरूलाई निर्देशन दिएको छ।
स्वास्थ्यकर्मी र राष्ट्रसेवक कर्मचारीमाथि कुटपिट र अभद्र व्यवहार गर्नेलाई कारबाही गर्न गृह मन्त्रालयले बुधबार ७७ जिल्लाका प्रमुख जिल्ला अधिकारीलाई निर्देशन दिएको गृह मन्त्रालयका सह-प्रवक्ता उमाकान्त अधिकारीले सेतोपाटीलाई बताए।
देशका विभिन्न ठाउँमा स्वास्थ्यकर्मीमाथि आक्रमण भएको समाचार सार्वजनिक भएपछि गृहले यस्तो निर्देशन दिएको हो।
'कोभिड-१९ रोकथाममा खटिएका स्वास्थ्यकर्मी र राष्ट्रसेवकको प्रभावकारी सुरक्षा व्यवस्था मिलाउन कार्यस्थलको उचित सुरक्षा मिलाउन तथा अभद्र र अवाञ्छित काम गर्नेलाई तत्काल नियन्त्रणमा लिन र कारबाही गर्न सबै जिल्ला प्रशासन कार्यालयलाई निर्देशन दिइएको छ,' गृह सह-प्रवक्ता अधिकारीले भने,'डोटीमा स्वास्थ्यकर्मीमाथि आक्रमण गर्ने तीन जनालाई नियन्त्रणमा लिइएको छ। उनीहरूमाथि कानुनी कारबाहीको प्रक्रिया सुरू भएको छ।'
रौतहटमा पनि स्वास्थ्यकर्मीमाथि कुटपिट भएको सूचना आएको र त्यसमा संलग्नको खोजी भइरहेको उनले बताए।
