चितवनस्थित भरतपुर अस्पतालमा मृत्यु भएका युवकको कोरोना नेगेटिभ देखिएको छ। आज बिहान साढे १० बजे मृत्यु भएको उनको स्वाब परीक्षण गर्दा कोरोना नदेखिएको अस्पतालका चिकित्सक डा. प्रमोद पौडेलले जानकारी दिए।
माडी नगरपालिका निवासी २७ वर्षीय उनलाई ज्वरोसँगै स्वासप्रस्वासमा समस्या देखिएपछि हिजो अस्पतालको आइसोलेसन कक्षमा भर्ना गरिएको थियो। तर आज बिहान एक्कासी युवकमा थप समस्या देखिएपछि आइसियू र पछि भेटिलेटरमा सरिएको थियो।
मृतक युवक १० दिनअघि भारतको नयाँदिल्लीमा उपचार गराएर फर्किएका थिए। परिवारकाले युवकको मेरुदण्डको हड्डी भाँच्चिएका कारण विगत ८ महिनादेखि भारतमा उपचार गर्दै आएको अस्पताललाई बताएका छन्।
भारतबाट फर्किएपछि उनी माडीस्थित क्वारेन्टिनमै बसेका थिए। बिहीबार एक्कासी ज्वरो र स्वासप्रस्वासमा समस्या देखिएपछि युवकलाई भरतपुर अस्पताल ल्याइएको थियो।
