‘भारतीय चेली’ शब्दमा प्रतिनिधि सभाका सांसदहरू आरोप-प्रत्यारोपमा उत्रिएपछि सभामुख अग्नि सापकोटाले उक्त विषयमा अध्ययन गर्ने बताएका छन्।
प्रतिनिधि सभाको आइतबारको बैठकमा रुलिङ गर्दै सापकोटाले सबै दलको प्रतिनिधित्व रहने कार्यव्यवस्था परामर्श समितिमा उक्त विषयमा छलफल गर्ने बताएका हुन्।
नेकपाकी सांसद गंगा चौधरीले गत जेठ १९ गतेको बैठकमा संसदमा 'भारतीय चेलीको दादागिरी देखिएको' टिप्पणी गरेकी थिइन्। जेठ २३ को बैठकमा समाजवादी पार्टीकी सांसद सरिता गिरी र राजपाकी सांसद अमृता अग्रहरीले विरोध जनाएका थिए।
गिरीले प्रतिनिधि सभाको रेकर्डबाट उक्त विषय हटाउन माग गरेकी थिइन्। उनले हिन्दी आफ्नो मातृभाषा भएकाले सपथसमेत हिन्दीमा लिएको उल्लेख गर्दै आफूलाई लाञ्छित गर्ने काम भएको बताइन्। राजपा सांसद अग्रहरीले भने कसैको रगत उम्लिए बाग्मतीमा हाम फाल्न सुझाएकी थिइन्। समाजवादी पार्टी र राजपा पार्टीले उक्त विषय हटाउन माग गर्दै आएका थिए।
आइतबारको बैठकमा राजपाकी सांसद चन्दा चौधरीले पुन: चौधरीको टिप्पणीलाई आपत्तीजनक रहेको बताएलगत्तै सभामुख सापकोटाले हस्तक्षेप गरेका हुन्।
'त्यो विषयमा सबै विवरण लिएर कार्यव्यवस्था परामर्श समितिमा छलफल गर्छु', सापकोटाले भने, 'त्यो विषयमा नजानुहोला।'
चौधरीले आफू वंशज नागरिक भएको उल्लेख गर्दै हिन्दी भाषा प्रयोग गरेको भरमा आरोपित गरिनु गलत भएको बताइन्। उनले हिन्दी बोल्दैमा सबै भारतीय नहुने बताइन्। उनले संसदमा आक्रोश व्यक्त गरिएकमा विरोध गरिन् र रेकर्डबाट हटाउन पुन: माग गरिन्।
लगत्तै सभामुख सापकोटाले बोल्ने क्रममा आरोप-प्रत्यारोपजस्तो भएको विषयमा नियमावलीको व्यवस्थामा ध्यानाकर्षण गराए। उनले प्रतिनिधि सभाको नियमावलीको २१ को (ङ) मा रहेको 'अशिष्ट, अश्लील, अपमानजक, आपत्तिजक शब्द वा सार्वजनिक शिष्टाचार वा नैतिकताको प्रतिकूल हुने गरी बोल्न र कुनै व्यक्ति, जाति, धर्म, भाषा वा लिङ्गलाई होच्याउने वा अरु कुनै किसिमले असर पर्ने गरि बोल्न नहुने' सांसदहरूलाई सचेत गराएका हुन्।
उनले जोखिमपूर्ण विषयमा संसद चलेको अवस्थामा व्यक्तिगत टीका-टिप्पणीतर्फ नजान आग्रह गरे। भिडिओ-
