समाजवादी पार्टी र राष्ट्रिय जनता पार्टी नेपाल राजपाबीच एकता भई बनेको जनता समाजवादी पार्टीमा तीन अध्यक्ष रहने गरी छलफल भइरहेको छ।
निर्वाचन आयोगमा दल दर्ताका लागि समय घर्किन लागेका बेला समाजवादी र राजपाका शीर्ष नेता आइतबार छलफलमा जुटेका हुन्।
‘दल दर्ताका लागि आजै निर्वाचन आयोगमा जाने विषयमा अहिले छलफल जारी छ,’ समाजवादीका नेता गंगा श्रेष्ठले सेतोपाटीसँग भने।
स्रोतका अनुसार राजपाका महन्थ ठाकुर, समाजवादीबाट बाबुराम भट्टराई र उपेन्द्र यादव गरी तीन जना अध्यक्ष रहने गरी जनता समाजवादी दल दर्ता गर्ने गृहकार्य गरिएको छ।
‘कति जना अध्यक्ष रहने, को-को रहने भन्ने हामी छलफलमै छौं,’ श्रेष्ठले भने।
जनता समाजवादीमा पदाधिकारी संख्या सानो बनाएर जाने विषयमा पनि छलफल भइरहेको छ।
राजेन्द्र महतो, अशोक राईलगायतलाई समेटेर पाँच सदस्यीय पदाधिकारी बनाउनेबारे छलफल भए पनि निर्णय भइनसकेको स्रोतले बतायो।
गत वैशाख १० मा समाजवादी र राजपा मिलेर जनता समाजवादी दल बनाउने गरी एकीकरण घोषणा गरे पनि निर्वाचन आयोगमा दल दर्ता भइसकेको छैन। दल दर्ताका लागि निवेदन दिएको ४५ दिनमा दुई पार्टीका शीर्ष नेता छलफलमा जुटेका हुन्।