पेट्रोलियम पदार्थमा गरिएको मूल्यवृद्धि फिर्ता गर्न माग गर्दै नेपाल विद्यार्थी संघले नेपाल आयल निगम लिमिटेडका महाप्रबन्धकलाई भेटेर ज्ञापनपत्र बुझाएको छ।
नेविसंघ अध्यक्ष राजीव ढुंगाना सहितको प्रतिनिधिमण्डल टोलीले असार १६ गते गरिएको मूल्यवृद्धि तत्काल खारेज गर्न माग गरेका हुन्।
कोरोना महामारी र लकडाउनले उपभोक्ताको जनजीवन कष्टकर बनेका बेला निगमले स्वचालित मूल्य प्रणालीसमेत उल्लंघन गर्दै पेट्रोलियम पदार्थमा मूल्यवृद्धि गरेको नेविसंघको आरोप छ।
‘अन्तर्राष्ट्रिय बजारमा मूल्य थोरै बढ्ने बित्तिकै ५ रुपैयाँ बढाउनु गलत हो। नाफा सञ्चित गरी मूल्यवृद्धि उपभोक्ताको थाप्लोमा हाल्ने प्रवृत्ति बन्द गरियोस्,’ नेविसंघले बुझाएको ज्ञापनपत्रमा भनिएको छ।
विभिन्न शीर्षक राखेर पेट्रोलियम पदार्थमा गरिँदै आइएको करसमेत तत्काल खारेज गर्न माग गरिएको नेविसंघ महामन्त्री दीपक भट्टराईले जानकारी दिए।
‘स्वचालित मूल्यप्रणाली तत्कालै पालना गर्नुपर्छ,’ नेविसंघको माग छ।
यस्तै, निगममा व्यवस्थापकीय सुधार, कालोबजारी नियन्त्रण गर्दै अनावश्यक खर्च कटौती गर्न पनि नेविसंघले माग गरेको छ।
‘मूल्यवृद्धि फिर्ता गर्नुको विकल्प छैन। अन्यथा जनता मार्ने यस्ता निर्णयविरूद्ध नेविसंघ कडा आन्दोलनमा उत्रन्छ,’ अध्यक्ष ढुंगानाले हस्ताक्षर गरेको ज्ञापनपत्रमा भनिएको छ।