प्रमुख प्रतिपक्षी नेपाली कांग्रेस देशभरि बाढी र पहिरोका कारण भएको जनधनको क्षतप्रति दु:ख व्यक्त गरेको छ।
शुक्रबार विज्ञप्ति जारी गर्दै कांग्रेस केन्द्रीय कार्यालयका मुख्य सचिव कृष्णप्रसाद पौडेलले प्राकृतिक विपतप्रति दु:ख व्यक्त गरेका हुन्।
‘अविरल वर्षापछि आएको बाढी, पहिरो र डुबानको कारणले देशका विभिन्न जिल्लाहरूमा जनधनको ठूलो क्षति भएको र पीडितहरूको जीवन कष्टकर बन्दै गएको छ। पछिल्लो घटना अनुसार- कास्कीमा ७ को मृत्यु र ११ जना घाइते, लम्जुङमा ३ मृत्यु र ४ घाइते, सिन्धुपाल्चोकमा २ को मृत्यु र २१ बेपत्ता, म्याग्दीमा ३२ जना बेपत्ता भएका छन्,’ विज्ञप्तिमा भनिएको छ,‘त्यसैगरी कैयौं नागरिक बासस्थानबाट विस्थापित भएका छन् र कैयौं स्थानहरूमा बाढी, पहिरोका कारण सडक यातायात अवरूद्ध भई नागरिकले कठिनाई ब्यहोर्न परेको छ। यो प्राकृतिक विपतको घटनाप्रति नेपाली कांग्रेस गहिरो दुःख व्यक्त गर्दछ।’
कांग्रेस सभापति शेरबहादर देउवाले थप मानवीय क्षति रोक्न कदम चाल्न सरकारलाई आग्रह गरेका छन् भने पीडितको उद्धारमा खटिन कार्यकर्तालाई निर्देशन दिएका छन्।
‘सभापति देउवाले यस संवेदनशील घडीमा प्रभावित नागरिकको जीवन रक्षा, उद्धार र राहतको कार्यलाई प्रभावकारी बनाउन छिटोभन्दा छिटो प्रभावित क्षेत्रमा उद्धार टोली खटाएर थप मानवीय र भौतिक क्षति रोक्न सरकारले सम्पूर्ण रूपले ध्यान केन्द्रित गर्न आग्रह गर्नु भएको छ भने प्रभावित क्षेत्रका नेपाली कांग्रेसका स्थानीय पार्टी निकायहरू तथा भातृ एवं शुभेच्छुक संघ संस्थाहरूलाई पनि पीडित परिवारलाई तत्काल उद्धार र राहत कार्यमा आवश्यक सहयोग पुर्याउन निर्देशन गर्नु भएको छ,’ विज्ञप्तिमा भनिएको छ।
बिहीबारदेखि परेको अविरल वर्षाका कारण सिन्धुपाल्चोक, लमजुङ, कास्की, पर्वत, म्याग्दी, रूकुम पश्चिम र जाजरकोटमा पहिरो आएको छ।
पहिरोमा परी अहिलेसम्म ३१ जनाको मृत्यु पुष्टि भएको छ भने दर्जनौं घाइते र बेपत्ता छन्।