अमेरिकाका साउथ चाइना सीमा अहिले चीनले गरिरहेका गतिविधि र दाबी गैरकानुनी भएको बताएको छ।
सोमबार एक विज्ञप्ति जारी गर्दै अमेरिकी विदेश मन्त्री माइक पोम्पेओले साउथ चाइना सीको स्प्राट्ली टापु आसपासको १२ नउटिकल माइल क्षेत्रमा बेइजिङले गरिरहेको दाबीलाई अस्वीकार गरेका हुन्।
‘हामी प्रष्ट पार्न चाहन्छौं कि साउथ चाइना सीको अफसोर स्रोतमाथि बेइजिङले गरिरहेका दाबी पूर्ण रूपले गैरकानुनी छन्। ती स्रोत नियन्त्रण गर्न चीनले अरू राष्ट्रमाथि जबरजस्ती गरिरहेको छ,’ पोम्पेओको वक्तव्यमा भनिएको छ,‘बेइजिङलाई साउथ चाइना सी आफ्नो समुद्री साम्राज्यजस्तो बनाउन विश्वले दिनेछैन।’
थुप्रै स-साना टापु भएको, प्राकृतिक स्रोतले भरिएको र प्रमुख समुद्री मार्ग साउथ चाइना सीमाथि ब्रुनाइ, मलेसिया, फिलिपिन्स, ताइवान र भियतनामलेसमेत दावी गरेका छन्।
यो क्षेत्रमा सैन्य र अरू रणनीतिक सहकार्य गरिरहेको अमेरिकाका लागि उक्त सीमाथि कस्को नियन्त्रण हुने भन्ने कुराले ठूलो महत्व राख्छ।
चीनले उक्त सीमा नक्कली टापु र सैनिक आधारक्षेत्र खडा गरेको छ। उसले सीमाथि नौ वटा काल्पनिक रेखा कोरेर उक्त क्षेत्र आफ्नो हक लाग्ने बताउँदै आएको छ।
साउथ चाइना सीमाथि दशकौंदेखि विवाद जारी छ। दुबै पक्षले त्यहाँ आफ्ना सैन्य गतिविधिहरू बढाइरहेका छन्।
पछिल्लो समय अमेरिका-चीनबीचको जारी व्यापार युद्ध, कोभिड-१९ महामारीको व्यवस्थापनमा आरोप प्रत्यारोप चलिरहेका बेला अमेरिकालाई साउथ चाइना सीबारे कडा अभिव्यक्ति दिएको हो।
चीनले भने अमेरिकाको अभिव्यक्ति चीन र उसका छिमेकीबीच फाटो ल्याउने मनसायले आएको जनाएको छ।