बेलायतले फाइभ जी नेटवर्क बिस्तारमा चिनियाँ टेलिकम्युनिकेशन कम्पनी हुवावेको प्रविधि प्रयोग नगर्ने निर्णय गरेको छ।
बेलायतले मंगलबार यस्तो निर्णय सार्वजनिक गरेको हो।
बेलायतको यो निर्णयलाई हुवावेका सामान र प्रविधि प्रयोग गर्दा राष्ट्रिय सुरक्षामै खतरा हुन्छ भनिरहेको अमेरिकी राष्ट्रपति डोनाल्ड ट्रम्पको प्रशासनको जितको रूपमा हेरिएको छ।
गत जनवरीमा बेलायतले सीमित मात्रामा हुवावेका सामग्री प्रयोग गर्न सकिने बताएको थियो। तर प्रधानमन्त्री बोरिस जोन्सनलाई देशभित्रैबाट बेइजिङविरूद्ध कडा कदम चाल्न दबाब परिरहेको थियो। मेमा अमेरिकाले हुवावेलाई अप्ठेरो पर्ने गरीथप प्रतिबन्ध लगाएको थियो।
प्रधानमन्त्री जोन्सनले अहिले बेलायतको टेलिकम क्षेत्रमा प्रयोग भइरहेका हुवावेका सामग्री र प्रविधि सन् २०२७ सम्ममा सबै निकालिसक्न पनि निर्देशन दिएका छन्।
पछिल्लो समय बेइजिङले हङकङमाथि राष्ट्रिय सुरक्षा कानुन लागु गरेपछि बेलायतले तीव्र बिरोध गरेको थियो। बेलायती उपनिवेश रहेको हङकङ सन् १९९७ मा ‘एक देश, दुई व्यवस्था’ अन्तर्गत ५० वर्षका लागि चीनलाई हस्तान्तरण गरिएको थियो। बेइजिङले नयाँ कानुन लगाएपछि बेलायतले सन् १९९७ अघि जन्मिएका हङकङवासीलाई बेलायती नागरिक सरह काम गर्न दिने बताएको थियो।
हुवावेका आलोचकहरूले उक्त कम्पनीको बेइजिङको सरकारसँग सम्बन्ध रहेको र उसले डाटाहरू जासुसी गर्न सरकारलाई उपलब्ध गराउने आरोप लगाउँछन्। हुवावेले भने ती आरोपहरू अस्वीकार गर्दै आएको छ।
.