ओखलढुङ्गाको लिखु गाउँपालिकाका अध्यक्ष गोविन्दबहादुर पौडेल तथा कर्मचारीमाथि हातपात गरेको आरोपमा १३ जना पक्राउ परेका छन्।
मंगलबार जिल्ला प्रहरी कार्यालयले सोही गाउँपालिकाको वडा नम्बर ४का एक महिलासहित १३ जनालाई पक्राउ गरेको डिएसपी रूपेश खड्काले जानकारी दिए।
उनीहरूले असार १२ र १३ गते कार्यालयमा गई अध्यक्ष पौडेलमाथि कुटपिट गर्दै गाउँपालिकाका कुर्ची, झ्यालहरूसमेत तोडफोड गरेका थिए।
त्यसकै विरूद्धमा उजुरी परेपछि उनीहरूलाई मंगलबार पक्राउ गरिएको हो।
पक्राउ पर्नेमा ३१ वर्षीय दीपक कार्की, ३२ वर्षीय भारती मगर खत्री, २२ वर्षीया निर्मला थापा, २२ वर्षीय दीपक थापा, २२ वर्षीय दिपेन्द्र खड्का र २० वर्षीय विश्वास खत्री छन्।
त्यस्तै २७ वर्षीय पारस खड्का, २७ वर्षीय अरूण कार्की, २३ वर्षीय विशाल भन्ने दलबहादुर थापा, २७ वर्षीय हरिचन्द्र भन्ने निल बहादुर कार्की, २० वर्षीय राजु कार्की, २४ वर्षीय लक्षमण कार्की र २१ वर्षीय दिप राज खड्का छन्।
असार ११ गते एम्बुलेन्स चालक सुर्दशन खत्रीको सवारी दुर्घटनामा मृत्यु भएको थियो। उनको भीरबाट खसेर मृत्यु भएको थियो।
'एम्बुलेन्स चालकको मृत्यु भएपछि उनीहरू क्षतिपुर्तिको माग गर्दै कार्यालयमा गएका थिए,' डिएसपी खड्काले भने, 'कुरा नमिलेपछि उनीहरूले गाउँपालिका अध्यक्षलगायत अन्य कर्मचारीमाथि हातपात गरे र कुर्ची झ्यालसमेत फुटाए।'
उनीहरूमाथि प्रहरीले अभद्र व्यवहारको मुद्दा चलाएको छ। ओखलढुङ्गा जिल्ला अदालतले उनीहरूमाथि अनुसन्धान गर्न १० दिन हिरासतमा राख्न अनुमति दिइसकेको छ।