राष्ट्रिय सभाको समितिहरुमा पुन: सभापति निर्वाचन गर्नुपर्ने भएको छ।
राष्ट्रिय सभाको नियमावलीमा समितिको कार्यविधि समाप्तीसँगै सांसदहरुलाई विभिन्न समितिमा छुट्याइएको जिम्मेवारी पनि सकिएको हो।
समितिहरु निष्क्रिय बन्ने अवस्था आएपछि राष्ट्रिय सभाका अध्यक्ष गणेशप्रसाद तिमिल्सिनाले पुन: सांसदहरुलाई विभिन्न चार वटा समितिमा विभाजन गरेका छन्। अब समितिहरुले सभापति चयन गर्नुपर्ने हुन्छ।
राष्ट्रिय सभामा दीगो विकास तथा सुशासन, प्रत्यायोजित व्यवस्थापन तथा सरकारी आश्वास समिति, राष्ट्रिय सरोकार तथा समन्वय समिति र विधायन व्यवस्थापन समिति गरि चार वटा समिति छन्।
राष्ट्रिय सभा अध्यक्ष तिमिल्सिनाले संसदको अधिवेशन अन्त्य भएपनि समितिहरुमा सांसदहरु चयन गरेका छन्।
समितिको गठन आदेशमार्फत् उनले अधिवेशन चालु नरहेको अवस्थामा पनि सदस्यहरु मनोनयन गरेका हुन्।
अब समितिहरुले सभापति चयन गर्नेछन्।
संसदीय समितिको सभापतिहरुले सिंहदरबारभित्रै कार्यकक्ष, सचिवालय पाउनेछन्। साथै संसद सचिवालयले सभापतिहरुलाई गाडी सुविधा उपलब्ध गराउँदै आएको छ।
यसअघि चारमध्ये तीन जना सभापति सत्तारुढ नेकपाका थिए। एउटा सभपाति भने प्रमुख प्रतिपक्षी दल नेपाली कांग्रेसले पाएको थियो।
